Vawiin a VC thlang dawn

Village Council inthlanpui neih tur atan tukin dar 7:00 atang hian Vote nei thei ten Vote an tlak tan dawn ta.

Mizoram District 9-a VC inthlanna neih tura ruahman angin Serchhip District-a VC 54-ah pawh inthlanna hi neih a ni dawn a, nimin khan he inthlanna neih tura Training hnuhnung ber chu Presiding Officer te tan Serchhip DC Conference Hall-ah neih niin hemi hnu hian inthlanna a hman tur bungrua te sem nghal an ni a, nimin vek khan venhimna hna thawk tur Police te pawhin an duty-na tur hmun panin nizan khan inthlan buaipuitute hian an duty-na tur hi thleng hman vek tura ruahman a ni a, tukin dar 7:00 atang hian Vote hi thlak tan a ni dawn a ni.

Ruahman lawk ang chuan Vawiin a VC inthlanna ah hian tlai dar 5:00 thlengin Vote thlak hun hawn a ni anga, hemi hnu hian VC Area tin ah Vote tla te hi chhiar nghal tur niin Returning Officer te chuan Result te chu District Election Officer Office-a Data Management Centre leh Control Room-ah report nghal zel a ni dawn a. Zanin zanlai veleh chuan VC inthlan result kim-chang pawh hriat theih beisei a ni bawk.

Serchhip District VC Election Observer, Robert C. Lalhmangaiha chuan, Serchhip District inbuatsaihnate chu fel fai leh tha tawk nia a hmuh thu sawiin, District Election Office leh khawtina duty tura ruat zawng zawngte inpekna ah lawmthu a sawi a. Inthlanna thianghlim leh fel fai tak buatsaih turin duhsakna a hlan a ni. Mipuite chu kokim taka vote thlak vek tura sawmin, hripui leng mek laka himna tura ruahmanna te tha taka lo zawm ngei turin a chah bawk.