Hri kai 25 hmuh belh leh

Niminpiah khan Mizoram-ah COVID-19 hri kai hmuhchhuah mi 25 zet an awm leh a, Aizawl District-a hri kai hmuhchhuah zingah mi 8 te chu hri kai te nen lo inkawm hnai an nih avangin Aizawl Veng thenkhat ah Total Lockdown kalpui leh nghal a ni.

Niminpiah khan ZMC Laboratory-a RT-PCR khawl hmanga Swab Sample enfiah 157 zingah COVID-19 vei 10 hmuhchhuah thar a ni a, heng mite hi Aizawl District ami vek mipa 3 leh hmeichhia 7 niin nausen thla 3 leh naupang kum 7 telin midang zawng hi kum 15-63 inkar an ni a. An zinga 8 hi hri kai nena lo inkawmhnai avanga Home Quarantine lai mek an ni a, a dang 2 hi Assam leh Karnataka atanga lo kir, Quarantine Facility-a awm mek an ni.

Niminpiah vek khan Rapid Antigen Test hmangin Kolasib District-ah COVID-19 hri kai mi 10 hmuhchhuah ni bawk a, heng te hi hnamdang lirthei khalhtu, mipa vek, kum 19-32 inkar, Assam state mi leh sa vek an ni bawk. Lunglei Civil Hospital TrueNAT Laboratory-a Sample enfiah 10 zingah COVID-19 vei 5 hmuh-chhuah a ni bawk a, heng mite hi BSF sipai, mipa kum 31 - 52 inkar an ni a, Quarantine Facility-a awm lai mek an ni.

Niminpiah-a Aizawl District-a hri kai hmuhchhuah zingah hian Chaltlang Lily Veng mi leh sa an awm avang leh heng mite kaihhnawih ah hian Contact tracing tih ngai a tam avangin nimin lam khan Aizawl Veng thenkhat chuan Total Lockdown an puang leh nghal a, Kepran khua atanga mikhual an neih avangin Kepran-ah hian Total Lockdown kalpui nghal a ni bawk.

Nimin khan COVID-19 hri kai mi 7 te chu Lunglei CCC atanga chhuahtir an ni bawk a, heti hian Mizoram-ah COVID-19 hri kai mi 648 hmuhchhuah ni tawhin an zinga mi 330 te chu enkawl dam an ni tawh a, hri kai enkawllai 318 an la awm mek bawk a ni.

India rama hri kai enkawl dam zaa 70 tling tawh :

India rama COVID-19 hri kai hmuhchhuah atanga zaa 70.37 te chu enkawl dam ni tawhin tun thlengin hri kai enkawl dam chu 16,39,599 an tling tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 7,33,449 enfiah leh niin heng te nen hian Sample enfiah zawng zawng chu 2,60,15,297 a tling ta a, heng atang hian hri kai 23,29,638 hmuh ni tawhin Sample enfiah atanga zaa 8.95 te chuan hri an kai tih hmuhchhuah a ni a, darkar 24 kalta chhung khan hri kai hmuhchhuah thar 60,963 an awm bawk.

India rama hri kai hmuhchhuah atang hian mi 16,39,599 te chu enkawl dam ni tawhin hei hi hri hmuhchhuah atanga chhutin zaa 70.37 a ni a, tunah hian hri kai enkawllai 6,43,948 an la awm bawk a, hri kai enkawllai aiin enkawl dam hi 9,95,651 in an tam tawh zawk a ni. Hetihlai hian India rama hri kai hmuhchhuah zingah pawh nunna chan awm zelin mi 46,091 zet an thi tawh bawk a ni.

Comments

Chhiar Hlawhte