Hri leng laka mipuite an him theih nana hmalak dan tur Chief Minister hovin sawiho

Nimin khan Chief Minister, Zoramthanga hovin COVID-19 laka Mizoram mipui an himna tur atana hmalak zel dan tur sawihona neih niin chhiatni-a inkhuahkhirhna kalpui dan tur sawiho a ni.

CM Conference Hall-a he sawihona hunah hian Chief Minister, Zoramthanga chuan hri laka kan him tlan zawk nan mipui, kan zavaiin fimkhur nachang kan hriat thar a pawimawh tih sawiin, nasa taka he hrik hi taidarh hluai thei kan ni tih hre reng chungin fimkhur takin kan awm tlan a tul tih a sawi a, “Fimkhur kan hmasak chuan kan vaia kan himna tur a ni,” tiin Testing ngawrh leh zawka tih zui zel pawimawh thu leh Rapid Antigen Test kits lei belh a nih tur thu a sawi bawk.

He thutkhawm ah hian Chhiatni thatni (mitthi vui, inneih, lungphun leh punkhawmna thil dangah) Social Distancing khauh taka kalpui a tul thu sawilan niin, mi tam tak an pungkhawm thin chu veiawm an tih thu sawilan a ni a. Kalkhawm zingah hri kai pakhat lo awm ta se, contact tracing tih zui a harsat theih tur thu te ngaihthlak a ni bawk. Hemi chungchangah hian mi 50 aia tamlo kalkhawm tur tih chu khauh taka kalpui nise tiin, Mitthi vui programme te chu Kohhran Hall-ah emaw, YMA Hall-ah emaw, Hall dang remchangah Social Distancing kalpui theihna tura ruahman mai nise tiin, kalkhawmte an hming, Veng leh biakpawhna tur Phone Number an ziahna tur Register chhawpchhuah vek nise tia rel a ni bawk.

Pungkhawm an tlem zawk theih nan Association emaw, eng Pawl emaw an member thi an lo awm a nih pawhin pawl emaw, hnathawh puite aiawhin mi pahnih aia tam lo intirh ni sela tia rel a ni a. Chhungkhat lainaah pawh a tlem thei ang ber an kal tur a ni, tih a ni a. Zaikhawm chu COVID-19 hrik thehdarhna remchang tak a nih avangin mitthi vuina ah zai loh nise tiin, kalkhawm tur zawng zawngte tha taka an hmai tuam tura tih an ni bawk.

He thutkhawmah hian State pawn atanga lo lut te uluk leh zuala enfiah dan tur te, Assam leh Tripura atanga lo lut tur te chu hri laka him te chauh State chhunga an lo luh phal a nih thu te, Frontline Worker te an him zawk nan a fimkhur lehzuala SOP siam chungchang te sawi a ni a. Community Spread a awm thulha inenkawlna hmun tur indaihlohna awm thei chungchang sawi ni bawkin, Kohhran hruaitute hmunhma a tul chuan hman a ngaih thu te sawi a ni bawk. Hei bakah hian Task Force Member zingah VC/LC inthlanpui-a Candidate tur an awm nual avangin heng mite hi Task Force hmalakna ah an tel thei tawhlo tih tarlan a ni bawk.

He thutkhawm ah hian Health & Family Welfare Minister Dr. R. Lalthangliana, Chief Secretary, H&FW Secretary, DM&R Secretary, IGP (Law and Order), DC Aizawl leh Health Department, Home Department leh DM&R Department Officer te, IMA, MKHC, Central YMA, MUP leh MHIP aiawhte an tel a ni.

Comments

Chhiar Hlawhte