Home Minister hovin Serchhip-ah India Independence Day vawi 74-na hman a ni

India Independence Day vawi 74-na chu Inrinni khan rampumah hman a ni a, hripui leng avangin kumdanga hman anga hmang lovin kumin hian sawmbik mi tlemte ten he Ni hi hman a ni a. Serchhip-ah pawh Home Minister, Lalchamliana hovin Independence Day hi urhsun taka hman a ni.

Serchhip-a India Independence Day lawmna hi Inrinni chawhma dar 11:00 khan Serchhip DC Office Tual-ah neih niin Home Minister, Lalchamliana chuan India Hnam puanzar pawtparhin mipuite hnenah thuchah a sawi a, Home Minister chuan Hnamdang awpbehna hnuai ata zalenna kan hmuh ni champha, ni chhinchhiah tlak takah India ram hruaitu ropui tak tak te, zalenna sual chhuaktute zahna chibai bukin an thawhrah zalenna zarah thangthar ten hmasawnna nasa tak kan hmuh chhoh thu a sawi a, kum reilote hnuah chuan kan ram India chu khawvela ram thiltithei ber te zing ami ah a inhlang kai ta hial a. Mizoram ngei pawhin hmasawnna duhawm tak tak hmunin India rama ziak leh chhiar thiam tamna State kan lo ni ta hial a ni, a ti. 

Home Minister chuan tunhnai maia Mizoram leh Serchhip District in hmasawnna hmel a hmuh hrang hrangte sawilangin, mipuiten khawtlang leh ram ralmuangah hmasawnna hna an thawha nun hahdam tak an hmuh zel theih nan khawtlang venhimna hna Police Department kaltlanga nasa taka thawh a nih thu sawiin, Serchhip District Police te pawh nasa taka thuamthar an nih thu a sawi a. Zu leh ruihhlo laka kan thalaite an him theih nana Police Department, Excise & Narcotics Department, tlawmngai pawl hrang hrang leh mipuite thawhhona tha tak chu fak tlak a nih thu a sawi bawk.

Hriselna chu rohlu a nih avangin hriselna lamah hma kan sawn theih nan hmalakna thar tam tak sawi tur a awm tih sawiin Home Minister chuan, Serchhip District Hospital-ah Trauma Centre tihzauh hna thawh mek a nih thu leh he Centre zauh hna hi zawh a nih hunah Operation Theatre leh ICU kum 5 awmna dah a nih tur thu a sawi a. Tunlaia khawvelin a buaipui mek CO-VID-19 dona kawngah pawh sawrkar hmalakna leh ram mipuite thawhhona tha tak avangin nunna chan kan la awm loh thu a sawi a, COVID-19 dona kawnga kan hmatawngte inpekna fakin he ni-ah hian zahna chibai a buk a ni. He hripui hian engchennge min chen chilh dawn tih hriat a nih loh avangin kan tan ho that zel a tul thute, himna tura tihtur te tha taka kan zawm zel a pawimawh thu a sawi a ni.

Heng bakah hian khuallian hian a Department chan- Home Department, Disaster Management & Rehabilitation Department leh Taxation Department chhunga tunhnaia hma-sawnna hnathawh hrang hrang leh ruahmanna awm te a tarlang bawk.

Serchhip-a India Independence Day lawmna hunah hian Serchhip District chhunga COVID-19 dona kawnga Community Quarantine Facility thawhtu Kohhran paruk- Presbyterian Serchhip Kawnpui Kohhran, Baptist Church of Mizoram (BCM) Serchhip, BCM New Serchhip Presbyterian Serchhip Bethel Kohhran, Principal Marian H/S leh Christ King Church Vacational Centre enkawltute hnenah  lawmthu sawina thilpek chu khuallian hian a hlan nghal bawk a ni.

Serchhip-a Independence Day lawmna ah hian sawmbik sawrkar Office tin-a hotute leh tlawmngai pawl hruaitute bakah MJA Member te an tel a ni.

Hemi hnu chhun dar 12:00-ah Serchhip Khawtetlang-a DC Chenna In-ah sawmbikte tan VIP’s At Home neih zui a ni a, he hunah hian sawmbik mi tlemte telin kumin hian kumdang aiin tel pawh an tlem zawk a, sawrkar Department thenkhat hotute leh NGO leh Kohhran hruaitu thenkhat te an tel a ni.

Comments

Chhiar Hlawhte