Chanchin thar thenkhat :

 Inthlan ah YMA Duty dawn

Lunglei District Election Officer, V. Lalsang-liana chuan nimin khan Lunglei District-a Village Council inthlanpui neih tur chungchangah Sub-Hqrs. YMA hruaitute kawmin tun tumah hian an District-a VC 113-ah inthlanna hi neih a ni dawn tih a sawi a, an District chhunga inthlanna muanawm leh felfai tak neih anih theihnan Sub-Hqrs. YMA Lunglei hruaitute chu hmalak pui leh thawhho puiah a sawm bawk. He hunah hian inthlanna atana inkaihhruaina siam te zirho a ni a, heng inkaihhruaina te hi mipuiten tha taka an zawm theih nan inthlan ni-ah Polling Station tinah YMA te Duty nise an ti bawk.


Aieng leh Dragonfruit thlang

Nimin khan Kolasib-ah District Level Monitoring Committee for Central Sector Scheme chu thukhawmin Kolasib District chhungah Farmers Producer Organisation (FPO) kaltlangin Aieng leh Dragonfruit a hmalakna neih nise an ti a, he thutkhawm kaihruaitu Kolasib DC, Dr. H. Lalthlangliana chuan sawrkar laipui ruahmanna a Kolasib District a Farmers Producer Orga-nisation (FPO) din tur a hmalakna a awm tur chu phurawm a tih thu leh thawhhona tha nen chuan loneitute tan hlawhtlinna a awm ngei a beisei thu a sawi bawk. He scheme hi 2020-2024 chhung kalpui tur niin, rampumah FPO 10,000 din tum a ni.


Hri kai 8 hmuh belh an ni

Niminpiah khan Mizoram-ah COVID-19 hri kai mi 8 hmuhchhuah leh niin Mizoram-a hri kai hmuhchhuah chu 657 an tling ta. Niminpiah a hri kai hmuhchhuah zinga 2 hi ZMC Laboratory atanga hmuhchhuah niin Lunglei TrueNAT khawl atangin hri kai 2 hmuh an ni bawk a, Rapid Antigen Test hmangin Aizawl District-ah mi 3 leh Kolasib District-ah hri kai mi pakhat hmuh an ni bawk. Hetihlai hian nimin khan Aizawl District-ah mi 4 enkawl dam an ni thung a, heti hian Mizoram-ah hri kai 657 hmuh ni tawhin mi 348 enkawl dam an ni tawh a, tunah hian mi 309 enkawl mek an ni bawk.


Pisa chawlh ah puang

Mizoram Governor chuan Section 5 of the Negotiable Instruments Acts 1881 in thuneihna a pek angin tun thla ni 27-a Mizoram District 9-a Village Council leh Local Council inthlanna neih turah Mizoram sawrkar hnuaia hnathawktu te, Central leh State Public Undertaking hnuaia thawktu, vote nei zawng zawng ten vote an thlak theihna turin August ni 27, 2020 chu sawrkar chawlh a puang.

Comments

Chhiar Hlawhte