Health Minister hovin COVID-19 chungchanga hmalak dan thlirhona leh sawihona neih a ni

Niminpiah tlai khan Health Minister, Dr. R. Lalthangliana hovin Mizoram-a COVID-19 hri leng mek chungchanga hmalakna thlirin sawrkar mi pawimawh te an thukhawm a, hmalakna tur hrang hrang pawh duan a ni.

Health Minister hova SAD Conference Hall-a thutkhawm ah hian Home Minister, Supply Minister leh I&PR Minister bakah Chief Secretary leh sawrkar mi pawimawh dangte an tel a, he thutkhawm ah hian Police leh Health & Family Welfare Department aiawh ten Contact Tracing an kalpui dan tarlangin, tunhnaia positive case thenkhat te hri kai dan chu chiang taka finfiah a har thu te an sawi a. Contact tracing chungchanga LLTF/VLTF ten anmahni vengchhungah theuh rang taka a tul anga chet an lak theih nan contact tracing chung-changa chetlak a nih dan te a hma thei ang berah inhrilhhriat thin nise an ti a. COVID-19 Ordinance bawhchhe si lovin Positive te Sddress leh chenna bawr chu LlTF te rang taka hriattir thin nise an ti a, hei hian fimkhur leh awmze nei zawka LLTF ten ruahmanna an siamna kawnga a pui thei dawn niin an hria a ni.

Hei bakah hian COVID-19 dona kawnga a hmatawnga thawktu, Frontline Workers, a bik takin Swab Sample latu leh thawktu dangte te chuan hri kai theihna chance an neih san bik avangin anmahni In-ah haw mai lovin hmun khata an riahna tur atan Tourist Lodge, Chatlang a Building thar an ruahman a. COVID-19 volunteer te pawh lawmman siamsak tha an ti a. Paramilitary Force zinga COVID-19 vei leh kai an tam thu sawilan niin, an zawm tur inkaihhruaina sawrkar in a siam te chu khauh taka kalpui chhunzawm zel a tul an ti a. Paramilitary Force zinga COVID-19 veite chu Civil mite nen hmunkhata dah an ni tawh ngailo tih pawh sawilan a ni bawk.

Ministry of Health & Family Welfare-in December thlaa Mizorama COVID-19 vei mi 5000 bawr awm tura an chhut (projection) chungchang pawh sawilan niin Health Department in ruahmanna an siam, Contingency Plan leh hemi atana thil tul te chu Health & Family Welfare Secretary in a sawifiah a. New Zealand in an kalpui mek COVID-19 dona kawnga hmalakna Risk Assessment chikhat, ‘COVID-19 Alert Framework Level’ chu Mizoram mila duang turin Planning & Programme Implementation Secretary hnenah mawhphurna pek a ni bawk.