Tuichangral-a kawng siam mek TCZP in an tlawh

Tuichangral Zirlai Pawl (TCZP) chuan kar kalta Ningani atanga Inrinni chhung khan an bial chhunga kawngpui siam hna thawh hrang hrang tlawhin a dinhmun an enfiah.

Tuichangral Zirlai Pawl (TCZP) hian PMGSY sum hmanga Lalroenga, Republic Veng Aizawl hnathawh Khawlailung to Piler te; R. Vanlalhluna, Edenthar Aizawl hnathawh Chekawn to Sialsir te; PWD hnathawh, Artahkawn to E. Lungdar leh E. Lungdar to Biate bakah, NABARD sum hmang a LZ Construction, Aizawl hnathawh Chekawn to N. Vanlaiphai te chu enin, hnathawktu lamte nen inpawh tlang taka hnathawh zel dan tur chungchang te, hnathawktute leh mipui lamin harsatna an tawh theih chungchangte sawiho a ni a; hnathawktute chuan mipuite tan theihtawp an chhuah tur thu leh leimin a awm palh pawha thianfai tura koh theih reng an nih thu an sawi a, TCZP chuan lawmawm an tih thu an sawi bawk.

Hei bakah hian hnathawh hun pel tawh, Extension of Time (EOT) dil belh, Khawlailung to Piler leh Chekawn to Sialsir chu kumin chhung a hna zo hman ngei tawh turin an beisei tih sawiin, hnathawhna tur sum awm sa, engemaw harsatna vang a la tan theih loh Artahkawn to N. Vanlaiphai (via Bawktlang) pawh hna thawh tan thuai a nih an beisei tih an sawi a. Chekawn leh Artahkawn inkar chu an bial chhung mai bakah khawchhak lam tlangdung thleng paltlang a ni tih sawiin, diak leh tui tlinlohna lai a awm lo tih tur khawp a chhia a nih tawh avangin Department leh Sawrkar hotute pawhin min ngaihpawimawh sak a, a rang thei ang bera siam a nih theih nan hma lak sak turin an ngen bawk.