District Bawrhsap in District Hospital tlawhin an harsatna hrang hrang a ngaihthlak sak

Serchhip District Bawrhsap, Kumar Abhishek IAS chuan nimin khan Serchhip District Hospital tlawhin a dinhmun hrang hrang a enfiah a, Damdawi In-a thawktute nen inkawmna neiin Damdawi In tih hmasawnna tur hrang hrangte an sawiho nghal bawk.

Serchhip District Bawrhsap, Kumar Abhishek hian nimin chhun khan Serchhip District Hospital hi tlawhin Hospital-a OPD hrang hrang- AYUSH, Dental, Eye leh General OPD bakah Ward zawng zawng leh Clinic hrang hrangte, Laboratory Room, Operation Theatre, TRAUMA Centre leh hmun dangte a tlawh kual bakah Central sawrkar hnuaia hmalakna thenkhat PMJAY (Golden Card) kalpui dan te, Rogi Kalyan Samiti (RKS-Hospital Management Society) hmalak dan te, a zawhchian bakah ART Centre thar, kumin March thla atanga Serchhip Hospital a kalpui tan hnathawh dan te pawh thawktute a zawtfiah a ni. Tun dinhmunah ART Centre-a enkawl lai HIV positive hi mi 161 an awm mek thu leh District pumpuia HIV positive zawng zawng zat chu 204 vel an nih thu thawktute hian an lo hrilh a ni.

Hemi hnu hian Serchhip District Medical Superintendent (DMS) Office-ah thawktute nen inkawmna neiin thawktute chuan Nurse indaihlohna an neih nasat thu Bawrhsap hnenah hian an lo thlen a, Nurse awm zawng zawngte chawlh la awm lova an thawh kim thapin zan-ah Ward zawng zawng vil turin Nurse pathum chauh an awm theih thu te, chawhma lamah panga (5), chawhnu lamah pali (4) chauh an duty theih thu te an sawi a. Tuna COVID-19 hripui vanga hmundanga inpawhpen loh theihloh lai phei chuan Nurse indaihlohna a san hle thu an lo sawi a. Hei bakah hian an mamawh hrang hrangte pawh Bawrhsap hnenah hian an lo thlen a, Bawrhsap hian a theihna chinah theihtawp chhuahpui zel a tum thu a hrilh hlawm a ni.

District Bawrhsap, Kumar Abhishek chuan, Serchhip Hospital Building chu a thar-a sak leh tihlen a tul hle tawh nia a ngaih thu a sawi a. Department in hma a lo lak tawhna chinte zir-chianga chak taka bawhzui tha a tih thu a sawi a. Tunlai-a kan mamawh em em COVID-19 enna khawl bunna tur hmunhma buatsaih mek pawh tlawhin thawktute chu chak taka thawk turin a hrilh a ni.

Serchhip District Hospital-a COVID-19 enfiahna khawl, Truenat Quattro PCR hman tur pawh Serchhip rawn thleng kim tawhin nimin-a damdawi In tlawhtu Bawrhsap hian Laboratory atana ruahman mek-a hnathawh pawh a tlawh nghal a, harsatna dangin a tlakbuak loh chuan hman tan theih thuai beisei a nih thu Dr. ZD Lalmuanawma, DMS chuan Bawrhsap hi a hrilh a. Bawrhsap hian District Hospital hnunga Solar Power Plant inbun, hman theih si loha awm reng pawh chu umzui ran a that thu a sawi a. Thawktute chu a tul ang zela tanpui a inhuam thu a sawi bawk a ni.

Nimin-a District Hospital tlawhtu Ser-chhip District Bawrhsap hi Addl. DC, Lalmuansanga Ralte leh District Information & Public Relations Officer, K. Saitluanga ten tawi-awmin District Medical Superintendent, Dr. ZD. Lalmuanawma leh Chief Medical Officer, Dr. Laldawngliana Sailo bakah Nursing Superintendent, C. Rodingpuii leh Ward Superintendent, Lalvenpuii ten an lo dawngsawng a ni.

Comments

Chhiar Hlawhte