SOC ten Scrub Suit leina atan CMO-ah sum an hlan

Serchhip Officers’ Club (SOC) te chuan an member te sum thawhkhawm atangin COVID-19 hri kai enkawltute mamawh, Scrub Suit leina atan nimin khan Serchhip CMO hnenah Rs. 15,000/- an hlan.

Nimin chawhnu-a he sum hlanna puala inkhawm tawi Serchhip CMO Conference Hall-a neih ah Serchhip Officers’ Club President, John Zorammawia chuan COVID-19 dona atan hian SOC-a Member te chuan an rem-chan ang ang sum leh pai an thawkhawm thu sawiin, cheng nuai khat chuang an hmu tih a sawi a. Amaherawh chu he hri leng mek hian eng chen nge min la tihbuai dawn tih hriat ala nih loh avangin an sum thawhkhawm te hi hmang zo nghal lovin an thawhpui, hri kai enkawlna a thawk mektu te mamawh, Scrub Suit leina atan hian Rs. 15,000/- chu hlan an rel tih sawiin, he sum hi SOC General Secretary, Vanlalchhana chuan Serchhip CMO, Dr. Laldawngliana hnenah a hlan a ni.

He sum hlanna hunah hian District Surveillance Officer, Dr. Lalhlunpuii chuan Scrub Suit an hmanna leh an mamawh dan sawiin, Serchhip-a COVID-19 hri kai enkawl a nih tirh khan a thawktute mamawh tur an thui tir thu a sawi a, tunhnaiah BSF Sipai hri kai enkawlna tur hmun siam a nih leh takah hian thawktute chu Shift thum (3) atan ruahman an nih thu leh Shift khat-ah hian mi 5 zel an awm thu sawiin, heng mite hian Suit pakhat theuh an indaih tur chu puanthan leiin an thui tir tih a sawi a. Amah-erawh chu Fur khaw chhia ah a ro har deuh avanga an indaih loh thu pawh sawiin, hetianga SOC ten sum leh pai an hlan chu an lawm hle tih a sawi a. Scrub Suit chu damlo enkawltute hak tur a nih thu leh damlo nen an inkawmhnaih lai nilo-a hak tur a nih thu a sawi a, damlo nen an inkawmhnaih dawn chuan PPE Suit an hak dawn thu a sawi bawk.

He hunah hian Serchhip CMO, Dr. Lal-dawngliana Sailo te pawhin SOC Member te inpekna chu lawmawm a tih thu a sawi bawk.