Aizawl-ah ‘Random Sampling Test’ kalpui tan niin Sample 500 vel enfiah a ni ang

COVID-19 hripui leng mekah Aizawl khawpui Veng hrang hranga mipui ten hri an kai leh kai loh endik runpui, ‘Random Sampling Test’ chu nimin khan kalpui tan a ni a, he hmalakna hnuaiah hian Aizawl khawpui chhunga Sample 500 vel enfiah tura ruahman a ni.

Integrated Disease Surveillance Programme (IDSP) State Nodal Officer, Dr. Pachuau Lalmalsawma chuan COVID-19 vei rinhlelhawm ni lo leh hri vei te nena inhnimhnai lo anga ngaih mi thenkhat Sample chu nimin atang khan Aizawl Veng hrang hrangah lak a nih thu sawiin, tun dinhmunah Random Sampling Test hi mi 500 vel hnen atanga lak tur a nih thu a sawi a. Mizoram-ah sample lak tur an pun zel lai leh hri kai hmuh thar an awm zel laiin Case thenkhat, a bul bal han zawm mai harsa laite a awm tan tawhah hi chuan Aizawl khawpui chu Mizoram darthlalang, a mar kan dehna tur pawimawh tak a ni tih a sawi bawk.

IDSP State Nodal Officer chuan Mizoram-ah hnuchhuina neih a pun avangin Sample lak ngai leh Sample la theite in siam belh a ngaih thu a sawi a, tun dinhmunah Mizoram pumah sample la thei Team 30 chho vel awm anga ngaih a ni tih sawiin, hetihlai hian a theih ang angin Sample latu te pawh tihpun mek a nih thu leh a tul huna thawk chhuak thei turin sawrkar chu a inkau reng tih a sawi a. Aizawl khawchhunga ‘Mutia’ te pawh an zavai-a enfiah turin an Sample enfiah chhoh mek a nih thu a sawi bawk.

‘Random Sampling Test’ kalpui tanah hian Aizawl chhimlam-a Veng 4- Mission Veng, Mission Vengthlang, Kulikawn leh Salem Veng atangin mi chi hrang hrang Sample lak a  ni.

Dr. Pachuau Lalmalsawma chuan Sample latu atan hian volunteer, mihuaisen, engmah beisei nei lova rawn penchhuak te pawh an awm thu sawiin, theihtawp pawh an chhuah thu a sawi a. Chutihlaiin an thiante mi pahnih khatin vanduaina avanga hri an lo kai palha an rilru tina thei ang chi hnualsuatna chu an tan tawrh hrehawm ber lai a nih avangin anmahni tiphur zawnga thil tih hi a hun takzet a ni, a ti bawk.

Comments

Chhiar Hlawhte