Chanchin thar thenkhat :

Zonuna Kawlni /
Hri kai mi 3 hmuh belh leh
Niminpiah khan Rapid Antigen Test hmangin Mizoram-ah COVID-19 hri kai mi 3 hmuhbelh an ni a, heng mite hi mipa 2 leh hmeichhia 1 niin Aizawl District mi 2 leh Serchhip District mi pakhat an ni a, Aizawl District-a hri kai hmuhchhuah thar hi mipa kum 25 a upa, Assam Regiment sipai, Jammu & Kashmir atanga lo haw leh hmeichhia kum 21 a upa, Assam atanga lo haw te niin Ser-chhip District-a hri kai hmuhchhuah hi Assam Regiment sipai, Assam-a rawn haw a ni thung. Nimin khan Aizawl District-a hri kai 2 te chu enkawl dam niin ZMC-a hri kai enkawl pakhat chu enkawl dam a ni bawk. Heti hian Mizoram ah hri kai hmuhchhuah 504 awm tawhin mi 284 enkawl dam an ni tawh a, hri kai enkawllai 220 an awm mek bawk a ni.

ZMC-ah ICU khum pe dawn
Nimin khan Supply Minister, K. Lalrinliana Office-ah ZMC-a COVID hri kai damlote tan ICU khum 15 pekna tur atana inremna Zoram Medical College (ZMC) leh Indian Oil Corporation Ltd. (IOCL) Official ten an ziak. ZMC-a COVID-19 hri kai damlote tana ICU Khum 15 man hi Rs.7,30,785/- niin hemi atana inremna ziahna ah hian Supply Minister chuan IOCL in CSR atanga thil tam tak a tih sak thin avangin lawmthu a sawi a, a bial-ah ngei pawh Ambulance an lo pek tawh thu leh tun, hun harsa ah pawh Gas leh Petroleum Supply hnianghnar taka an pe thei chu lawmawm a tih thu a sawi bawk.

IASE-ah khawl thar hmang
Mizoram-a a hmasa ber atan Temperature Monitoring Access Control Terminal chu Institute of Advanced Study in Education (IASE) Office-ah nimin khan hman tan a ni a, he khawl thar hi hrileng mek COVID-19 laka mipui him tlan zawk beiseina avanga Dahua Company, Delhi atanga chah niin Rs. 1,50,000/- sen a ni. He khawl hian hmel a chhinchhiah a, hmaikawr vuah leh vuah lo endikin, a vuahlo an awm anih chuan vuah turin a ti thin a ni.

Sports Minister in hawng
Sports Minister, Robert Romawia Royte chuan nimin khan Aizawl Chite Veng-ah Health Clinic Centre hawngin KVM High School-ah Basketball Court a hawng bawk a. Aizawl Saron Veng kaltlanga Chhinga Vengthar leh Tuithiang inkal-pawhna tur ‘Lalat Bridge’ tia a hming vuah, lei dawh hnathawh bultanna tur lungphum a phum nghal bawk. Hemi hnu hian Sports Minister hian Dawrpui Multipurpose Centre-ah Multilevel Parking cum Basketball Court sakna tur lungphum a phum leh bawk.

Finance Commission din duh
All Mizoram Village Council Association (AMVCA) chuan nimin khan Aizawl Press Club-ah thuthar thehdarhtute kawmin 2nd State Finance Commission 2020-2025 nei lovin Mizoram State sawrkar a kal mek tih an sawi a. Mizoram State Annual Budget 2020-21 ah VC te tana sum ruahmanna pakhatmah dah a nilo nia sawiin, 15th Central FC pawhin sum min pek chhunzawm duhloh chhuanlam ah an hmang ang tih a hlauhawm tih an sawi a, 2nd State Finance Commission din vat an duh thu an sawi bawk.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »