Congress hnathawh that zia pholang niin sawi

Congress Legislature Party (CLP) Leader, Zodintluanga chuan MNF sawrkar chu Congress sawrkar hnathawh thatzia tarlang tura Pathian ruat nia a ngaih thu a sawi. Aizawl District Congress Committee buatsaiha Inrinni-a Political Training neih ah Zodintluanga MLA chuan Congress sawrkar hnathawh that chu COVID-19 avangin zep rual lohin a lang chhuak nia sawiin, Congress sawrkar khan hmasawnna hna lo thawk tha lo se chuan COVID-19 avang hian dinhmun chhe lehzualah kan ding dawn a lo ni reng tih a sawi a. Congress sawrkar leh hnua Referral Hospital dinthar leh chu Medical College hiala din chhoh Zoram Medical College (ZMC) tia MNF-in a hming an thlak tak chu COVID-19 veite enkawlna hmunpui atan hman a nih thu leh Congress sawrkar khan Referral Hospital hi lo tihlawhtling lo ta se kan buai hle dawna a hriat thu a sawi.

Bairabi Rel Station chungchang pawh sawiin, “Congress sawrkar in a pawimawhna tur hriain Bairabi Rel Station a siam a, Rel lian tlan theih tura a lo tihlen avangin COVID-19 vanga phai lam atanga lo haw tam zawk ten awlsam takin Mizoram an lo thlen theih phah a ni,” a ti.

MNF sum enkawl kalhmang a hmuh dan a sawina ah Zodintluanga chuan, “MNF sawrkar kum 5 a liam hnuah COVID-19 hi lo thleng ni ta se, an sum enkawl dan thlirin kan dinhmun a chhe ngawt ang. Sawrkar hnathawk hlawh an pe kim thei lo a, mipui thawhkhawm CM Relief Fund hmangin COVID-19 an do a, titha an inti em em ringawt mai a ni. Finance Minister berin sawrkar sum kalhmang a hre thlawt lo a ni tih chiang taka hai lan a ni tawh bawk,” tiin MNF sawrkar chuan mipui rin a hlawh tawhlo niin a sawi bawk.