Pawngsualtu chhui zui mek

Kar kalta Nilaini, July 29, 2020 tlai-a S. Lungrang khuaa nu pakhat pawngsualtu mi 2 te chu chhui zui mek an ni. Thudawn danin Lunglei District chhung S. Lungrang khuaa nu pakhat chu July 29 tlai khan lo lam-a riak a pasal leh a pa fin tura kalin an Lo peng a thlen hma lawkin an khua atanga Lunglei lam pana kal pik-up a chuang mi 2, hmaituam te chuan an Motor-ah chuang turin an sawm a, a duhloh avanga an tlanpelh hnuah ke-a rawn let lehin he hmeichhia hi an pawngsual rawn ta nia thudawn a ni. He Hmeichhia hian Motor-a chuang tura an sawm hian heng mite hian Mizo tawng pai tak an hman thu a sawi a, an sual dawn lai hian Chemte nen an vau tih pawh sawiin, he thil thleng chungchangah hian Lungsen Police Station-ah FIR thehluh nghal a ni bawk.

He thil thleng chungchang hi Police te chuan chhui zui nghalin he thu buatsaih lai thleng hian rinhlelh man an la nei lova, he Motor hian Lunglei lam pan niin hre mah se Lungrang khua pelh hnu hian pengthuam tam tak a awm avangin khawi ber nge an zawh hriat theih a ni rih lova, amaherawh chu hmun hrang hrangah a theih anga chhui zui nghal a ni.

Hetianga hmeichhia te chunga rawva taka chetna duhloh lantirna atan hian Inrinni zing khan Lungrang-ah MHIP huaihawtin kawngzawh a ni a, he huna tel te chuan he thil thleng hi an duhloh thu leh an dem thu bakah pawikhawihtu manchhuah an phut thu te an sawi bawk a ni.