Latest News

District 9-a VC leh LC inthlanna buatsaih theih beisei niin thutlukna puan thuai beisei a ni

Mizoram State Election Commission chuan Mizoram boruak enin Local Council leh Village Council inthlanna chu neih theih ah a ngai nia thudawn a ni a. Mizoram District hrang hrang 9-a Village Council leh Local Council inthlanna neih hun tur hi hun reilote ah puanchhuah beisei a ni bawk.
Zirtawpni khan State Election Commission hian Mizoram District hrang hranga Mizoram District 9-a  District Election Officer leh Election Officer te chu Meeting neihpuiin Mizoram-a Village Council leh Local Council inthlanpui neih tur chungchang hi a sawipui a, he hunah hian District hrang hrang atanga tel te chuan hri leng avanga inthlanpui huaihawt theih leh theihloh chungchangah an ngaihdan te an sawi bawk a, heng atang hian State Election Commision chuan thutlukna a siam beisei niin tunkar chho hi chuan thutlukna pawh hi an rawn puan mai beisei a ni bawk.
State Election Commissioner, Laima Chozah chuan Covid hri leng a ziaawm chho zela a lan avangin Local Council leh Village Council inthlanna nei turin an inbuatsaih chho mek tih a sawi a. “Tun dinhmunah COVID-19 hi vantlanga inkaidarh (Community Spread) a awm lo niin a lang a, inthlanna hi neih theihah kan ngai a. Chuvangin, thil tih tul ang angte kan buaipui chho mek a ni,” a ti.
Inthlan ni tur tak chu la puan a remchang hrih lo tih sawiin, “Local Council leh Village Council inthlan hnuhnung ber kha April ni 30, 2015-ah neih a ni a, May ni 7, 2015-ah inthlan kaihhnawih zawng zawng chinfel vek a ni a. Tun tumah pawh hian September ni 7, 2020 hmaa inthlan kaih-hnawih zawng zawng chinfel vek a ngai a ni,” tih State Election Commissioner Laima Chozah chuan a sawi a, Local Council leh Village Council inthlanna chu a ruala neih a ni dawn niin a sawi bawk.
Tarlan tawh thin angin Mizoram District 9-a Village Council dinglai te hun hi kumin May 7 khan tawp tawh tur a ni a, hei vang hian inthlanna buaipui turin Electoral Roll ennawn hna pawh thawh niin hri leng avangin a khaihlak ta thung a. Hei vang hian sawrkar chuan VC leh LC dinglai te term hi tum hnih pawtsei tawhin September 7 thleng khi pawhsei sak an ni a, tunah chuan Electoral Roll siam hna pawh chhun-zawmin zawhfel a ni tawh nghe nghe a ni.

Comments

Popular News (Last 30 Days)