Mizoram Health Policy neih rel a ni

SEDP hnuaia din Health & Family Welfare Board chu nimin khan Health Minister, Dr. R. Lalthangliana hova thukhawmin Mizoram Health Policy mumal leh felfai tak nei tura hmalak an rel. SAD Conference Hall, Aizawl-a he thutkhawm ah hian Health Minister Dr. R. Lalthangliana chuan National Health Policy awm tho mahse India Constitution-a Seventh Schedule ah “Public Health and Sanitation; Hospitals and Dispensaries” chu State sawrkar thuneihna ‘State subject’ hnuaiah dah a ni tih sawiin, National Health Policy kalh si lovin, Mizorama kan hriselna dinhmun leh hmabak thlir chung si hian Target/Goal nei a hriselna lama kan thlen chin tur leh kalphung tur mumal taka ruahman a pawimawh tih a sawi a. Hemi atana pawimawh tak Mizoram Health Policy tihlawhtling tur hian a chak thei ang bera hmalak a ni ang, a ti.
Health Minister chuan bungrua leh hmanrua man to tak taka kan lei, kan hman tangkai hleihtheih siloh te a awm thei tih pawh sawiin, bungrua lei dawnin engkim ngaihtuah lawk a, a dahna hmun tur te thlengin ngaihtuah lawk a pawimawh a, a dahna tur hmun neih loh avanga bungraw man to leh tangkai tak tak tur pawh hman tangkai hleihtheih lohin a awm palh thei a, bungrua leh hmanraw lei chungchangah department te mumal leh fimkhur zawka kal a tul a ni, a ti bawk. Health Minister chuan SEDP hnuaiah pawh Health Care Scheme (HCS) chu an ngaih pawimawh ber pakhat a ni tih sawiin, Chief Minister pawhin Health Care Scheme atan hian sum lamah harsatna a awm tur a nilo tia alo sawi tawh thu leh mipui pawhin chhawr tangkai se a duh thu a swi bawk.
Health & Family Welfare Board thukhawm hian Health Department hnuaia hmanrua leh bungrua te, thawktu mihring zawng zawngte dinhmun leh awm zat, hnathawhna hmun leh thil pawimawh dangte mumal taka chhinchhiahna tur Inventory Management System neih tul an ti a, awlsam taka bungrua, hmanrua leh thil pawimawh dangte enfel zung zung a nih theih nan Database Software Inventory rang taka neih an rel a. Hei bakah hian Hospital Information Management System felfai leh mumal tak neih a tul thu an sawi bawk.
Health Department-a thawktu indaihlohna nasa lutuk phuhru turin a tul ang anga hmalak tum a ni a, Health Department hnuaiah hian Post ruak 782 a awm a. Heng zingah hian MBBS - 15, Specialist - 4, Dental Surgeon - 11, AYUSH Doctor - 23, Ward Superintendent - 30, Staff Nurse - 161, Community Health Officer - 32, Health Supervisor - 94 (Mipa - 52, Hmeichhia - 42), Health Worker - 236 (Mipa - 129, Hmeichhia - 107), Laboratory Technician - 44, X-Ray Technician - 15 leh Group D - 117 a tel a. Daktawr thahnem tak deputation leh chhan dang vanga hmundanga kal an awm nual bawk a ni.

Comments

Chhiar Hlawhte