Chanchin thar thenkhat :

 Hri kai 5 hmuh belh leh

Mizoram-ah Zirtawpni khan COVID-19 hri kai hmuhchhuah thar an awm lova, Inrinni ah hri kai 5 hmuhchhuah an ni thung. Zirtawpni kalta khan Mizoram-ah Sample 371 zet enfiah leh niin heng atang hian hri kai hmuhchhuah an awm lova, Inrinni khan ZMC Laboratory-ah Sample 831 enfiah niin hri kai mi 5 hmuh an ni a, heng hri kai hmuhchhuah te hi Mamit District mi 2, State pawn atanga rawn haw te, Kolasib District mi State pawn atanga rawn haw 2 leh Aizawl Venglai mi pakhat, an Veng LLTF hri kai hmuhchhuah tawh atanga kaichhawng nia rin te an ni. Heti hian Mizoram-ah COVID-19 hri kai hmuhchhuah chu mi 1008 an tling ta a, Inrinni khan mi 70 zet te chu anmahni enkawlna hmun atanga chhuah-tir niin nimin khan mi 5 an chhuak leh a, tunah hian hri kai enkawl dam mi 589 an awm tawh a, hri kai enkawllai 419 an la awm mek bawk.


Councillor in Scooty hlan

Aizawl Municipal Corporation (AMC) Ward No. V-a Councillor, Rosiamngheta chuan pian-phunga rualbanlo, Lalrammawii, Vaivakawn hnenah TVS Scooty a pe a. Lalrammawii hi ke-a kal theilo niin mite khawngaihna avangin AMC Office-ah hian a nghet lovin a thawk a, Office a kal tur pawh hi a pu leh mi tlawmngai ten an hruai thin nia sawi a ni a. Harsatna a tawh hi hriatpuiin Rosiamngheta hian Scooty hi a pe ta a ni. Rosiam-ngheta hian tunhnai khan a bial chhunga Veng 3 - Electric, Zarkawt leh Chanmari LC te hnenah damlo, lirthei nei remchanglo te tana hman turin Ambulance pakhat theuh a lo pe tawh bawk a ni.


Dy. CM thiltih ZPM in dem

Zoram People's Movement (ZPM) chuan Deputy Chief Minister, Tawnluia chuan a bial chhung Tlangpui khuaa VC member thlanchhuah thar, ZPM te chu MNF a inlet turin a thlem mek nia sawiin, hetianga ram hruaitu inthil bawlhhlawh tak, mipui thlantlin hruaitute uire tuma an bei chiam mai avang hian ram hruai hna thawk tlaklo ah an ngai tih an sawi bawk.


COVID-19 test-na ruahman

Mizoram sawrkar Health Department chuan thuchhuah siamin Mizoram-ah a tam thei ang ber COVID-19 Test nei turin Vawiin, August 341, 2020 atang hian R. Dengthuama Hall, Salem Veng Aizawl chu hri kai leh kai lo endikna hmun atan a hmang dawn a, hetah hian a duh apiangte tan COVID-19 test tih theih a ni dawn a ni.


Vawiin Synod Ramthar ni

Vawiin August 31, 2020 hi Mizoram Presbyterian Kohhran ni pawimawh, ‘Ramthar Ni’ a ni a, he ni hi Mizoram-a Presbyterian Kohhran rawn dintu Rev. David Evan Jones (Zosaphluia) Mizo-ram a rawngbawl tura a lo thlen ni niin kum 1973 atang khan Ramthar Ni atan hian hman a ni a, hri leng avangin kumin chuan he ni puala hunhman a awmlo thung ang.

Comments

Chhiar Hlawhte