Serchhip-ah VC thlan thar ten VC Executive Body thar siam turin hma an la chhunzawm mek

Village Council inthlanpui neih zawh a nih hnuah Serchhip khawpui chhunga VC Area hrang hranga thlantlin te chuan VC Executive Body siam turin hma an la mek a, VC thenkhat ah te erawh chuan thlantlin te karah harsatna ala awm mek nia thudawn a ni.

Ningani kalta a Village Council inthlanpui neih zawh taka VC member atana thlan thar te chuan anmahni huamchhung theuh ah Village Council Executive Body thar din tur hian hma la mekin sawrkar in ruahmanna a siam dan chuan Village Council thlan thar te hian thla thar September 4 ralhmain Executive Body hi siamfel tur a ni. MNF in Party mal-a sawrkar an siam theihna Serchhip-I (Vengchung leh Saron Veng) VC-ah chuan Executive Body siam fel ni tawhin B. Vanlalngura chu VC President a ni anga, Vice President-ah Lalrinthuama Kawlni leh Treasurer-ah C. Denghmingthangi te niin PC. Lalmuankima chu Secretary a ni ang.

ZPM in Seat 3 laa sawrkar an siam theihna Serchhip-II (Dinthar Veng)-ah nimin tlai khan thlantlin te inhmukhawmin an chanvo tur an insiamfel thu leh tukin hian puanchhuah a nih tur thu an sawi a. Serchhip-IV (Bazar Veng area) VC-ah chuan MNF in sawrkar siam dawnin tukin hian Executive Body siam fel tum a ni a. MNF in Seat 5-a Seat 3 an lakna Serchhip-V (Field Veng, Ramthlun leh Field Road)-ah chuan MNF in Executive Body din felin Lalfakawma chu President a ni dawn a, K. Lianzuia chu Vice President niin Lalhlupuii chu Treasurer a ni anga, amaherawh chu naktuk ah Official-a puan tur a ni chauh thung ang.

Serchhip-VI (Hmar Veng)-ah chuan nimin tlai khan Congress atanga thlantlin te inhmu-khawmin Vawiin lam hian an chanvo tur puan theih an beisei tih an sawi a. Party mal-a sawrkar siam thei awmlohna Serchhip-VIII (P&E Veng) ah chuan MNF leh Congress tangdun in sawrkar an siam dawn a, MNF atangin C. Vanlalsiamthara chu VCP niin Congress atangin F. Lalhmangaiha chu Vice President a ni anga, Lungtiawii (MNF) chu Treasurer niin F. Vanlalropuia chu Secretary a ni bawk ang. New Serchhip North-ah chuan C. Lalrotluanga chu VCP tura ruahman niin midang pawh tihtel an ni tawh nia thudawn niin puanchhuah thuai tum a ni a, New Serchhip South VC ah pawh Rengliana chu VCP tura ruahman niin naktuk ah chiang zawka puan tum a ni bawk.

Hetihlai hian VC thenkhat ah chuan sawrkar siam dan tur tihfel ala nilo thung a, hriat theih chinah Village Council thar Serchhip Chanmari Veng leh Darnam VC te chuan Vawiin lam hian tihfel theih an beisei tih sawiin, Serchhip-VII (AOC, Venglai leh Leisang) pawhin Vawiin hian tihfel theih an inbeisei tih an sawi a, Chhiahtlang South VC leh Chhiahtlang North VC te pawhin Vawiin lamah tihfel an inbeisei tih an sawi bawk.