Chanchin thar thenkhat :

By-Election ah MNF chak

Mara Autonomous District Council (MA-DC) hnuaia MDC Seat ruak pakhat hnawhkhat tura inthlanna neih zawh taka Vote tla te nimin-a chhiar ah MNF Ticket-a ding chu thlantlin a ni. MADC hnuaia Siaha North-I MDC, Ng.Silla a boral avanga a hmunruak hnawhkhahna tura Ningani-a by-election neih a vote tla te hi nimin chawhma dar 11:00 atang khan Siaha DC Office-a Planning Branch Room-ah chhiar niin MNF candidate, Nahlo Solo chu thlantlin a ni a, he inthlanna ah hian Vote nei mi 1627 atangin mi 1368 ten Vote thlakin Nahlo Solo hian Vote 565 a hmu a, amah hnaih bertu BJP Candidate, B. Zahra chuan Vote 558 hmuin Nahlo Solo hi Vote 7 in a sang zawk a, INC Candidate N. Alfred chuan Vote 89 a hmu bawk a ni. Heti hian MA-DC-ah hian Elected Seat 25 awmah BJP chuan Seat 19 neiin MNF in Seat 6 an nei mek a ni.

Network Provider te hriattir

Mizo Students' Union (MSU) District Hqrs. Mamit chuan Mizoram University in College Even & Odd Semester Examination Online/Offline hmanga September 1 atanga ni 21 thleng a buat-saih turah Mamit District chhungah Network thatloh vanga zirlaite'n harsatna an tawhloh nan Network Providers zawng zawngte chu Internet Service tha zawk pe chhuak turin a ngen a, zirlai ten Exam an neih hun chhunga darkar bithliah a shut down la lo tur leh network khaihlak thei pum-pelh nan backup tha tawk chhawp turin Network Providers te chu an hriattir bawk.

MNF Party in lawmthu sawi

MNF Party chuan Mizoram Local Council leh Village Council inthlanpui chu buaina leh harsatna em em awm lova neih a nih thu sawiin, Hripui leng karah pawh khua leh tuite dikna chanvo ngai pawimawhin mipuiin thahnemngai taka Vote an thlak avangin Vote thlaktute chungah lawmthu an sawi a. Khua leh veng hrang hranga MNF candidate thlangtlingtu mipui chungah lawmthu an sawi nghal bawk.

ZPM President in lawmpui

ZPM President, Lalliansawta chuan Mizo-ram-ah Local Council leh Village Council inthlan thawhkhatna neih zawh takah rorellai MNF Party in Seat la tam ber nihna an hauh chu an lawmpui thu sawiin, ZPM hminga tling te pawh thinlung taka an lawmpui thu a sawi a. ZPM hminga chuh zinga tling ta lo te chungah pawh lawmthu sawiin, pawl tana an inpekna leh an tlawmngaihna nasa tak te chu ropui an tih thu a sawi a. Pawl naupang tak ZPM hminga engkim huam-a an dingchhuak ngam hrim hrim chu pawl tan a hlut thu a sawi bawk.

MPCC in duhsakna hlan

Mizoram Pradesh Congress Committee (MPCC) chuan AMC hnuaia Local Council 59 leh Village Council 551-a inthlanna chu hri leng karah neih zawh a ni ta tih sawiin, Vote thlak duh tam tak awm mah se hrileng kai hlauh avangin neutral tam takin vote an thlak thei lo chu pawi an tih thu an sawi a. Chutihrualin, vote thlaktu mipuite’n an thlantlin te an lawmpuiin, anmahni thlangtlingtu mipui beiseina ti hlawhtling tura an veng leh khaw tana theihtawp chhuah turin duhsakna an hlan bawk.

University Final exam hun atan September 30 ruat

Supreme Court chuan UGC remruatna angin University Final Exam neih hun atan September ni 30 a ruat. University Grants Commission (UGC) in July ni 6-a Circular a tihchhuah angin, University leh College zirlaite final exam neih hun atan September ni 30 a ruat a, UGC thuchhuah hi ngaihtuah tha leh tura ngen a nih hnuah Justice Ashok Bhushan awmna Bench chuan nimin khan Exam hi UGC remruatna angin a ngai a kaltlangpui a nih tur thu a tarlang.a