Chanchin thar thenkhat :

Mamit-ah VLTF thukhawm

Nimin khan Mamit-ah District Bawrhsap, Dr. Lalrozama hovin Mamit khawpui chhunga Village Level Task Force (VLTF) te chu DC Office Chamber-ah an thukhawm a, he thutkhawm ah hian Mamit khawpui chhunga zin haw, zin chhuak  leh mikhual neih chungchang sawiho niin engemaw thulhah Contact Tracing neih a awlsam zawk nan mikhual nei turte chuan Veng tina VLTF Secretary-te hnenah in-report zel tura tih a ni. Hei bakah hian COVID-19 hrileng avangin harsatna kan tawk chho zel dawn nia a lan thu sawilan niin, he hrileng nena chenho kan zir thiam a ngaih thu an tarlang a, mimal tinte hrileng lak a inven leh kan fimkhur tlan a tul thu pawh sawi-lan niin hemi chungchang hi YMA Information Mike hmangin a tam thei ang ber puanzar thin nise an ti bawk.

Ramri-a duty in hri kai

Vairengte COVID-19 test-na hmuna duty zingah COVID-19 hri kai vei pakhat hmuhchhuah a ni. He thu hi Kolasib District Magistrate, Dr. H. Lalthlangliana chuan thuthar thehdarhtute zawhna chhanga sawiin, he hri kai hmuhchhuah hi dah-hran a nih tawh avang leh a thawhpui mi tlemte bak tlawhpawh a neihloh avangin chhui zui a buaithlak loh thu a sawi a, a thawhpui Medical Team te pawh Sample lak sak niin tun dinhmun ah hri vei dang hmuhchhuah an awmloh thu a sawi bawk.

Ruihhlo man sa halral

Lunglei Sub-Hqrs. YMA chuan nimin khan ruihhlo an man halralna hun Lunglei-ah an buat-saih a, he hun hi MJA Lunglei District President, H. Lalthansanga chuan a hmanpui a ni. Nimin a ruihhlo halral tak hi Heroin No. 4 Hawng 61 niin tualchhung-a hralhna rate chuan Rs. 48,80,000/- hu a ni. Lunglei SADS report in a tarlan danin thla hmasa, July 5 atanga nimin thleng khan dam-dawi ruih chi Alprozolam mum 268 leh Rakzu um 226 bakah No. 4 hawng 107 an man tawh bawk a ni.