Assam Rifles chet dan chungchang sawihona nei

Inrinni tlai khan Chief Minister, Zoramthanga hovin a Pisa-ah Chief Secretary, Lalnun-mawia Chuaungo leh Central YMA hruaitute inkawmkhawmna neih a ni a. He hunah hian tunhnaia Vairengte-a Assam Rifles te chet dan chungchanga an lungnih loh thu leh hmalak zel dan tur an sawiho a ni.

COVID-19 hripui leng mek do kawngah Mizoram sawrkar leh mipui tangrualin theihtawp an chhuah laiin, Assam Rifles ten Vairengte-ah mawilo taka an lo chetna te, chung mai bakah Independence Day lawmna-a an kal duhlohna chungchang thu te leh hmundang danga an chet dan mawilo te he meeting-ah hian an sawilang a. Heng thu te hi Assam Rifles te chunga roreltu leh thuneitu Home Ministry hnenah a rang thei ang berin thlen nise an ti a ni. 

Sawrkarin heng thil thleng te hi uluk taka lakhawmin a ruahman mek a. Central YMA pawhin sawrkar laipui hnena thlen an duh thu an sawi bawk a. Thil nihna dik tak tarlangin, thil thlen dan engmah zep awm lova sawifiahin sawrkar atang leh Central YMA, NGO atangin lehkha thawn thlak a, a tul anga na taka hmalak zel ni se an ti a ni.