THENZAWL ZOFATE KHAWPUI TUR

THENZAWL ZOFATE KHAWPUI TUR

- Zaichhawna Hlawndo

Kum 2015 November thla khan Upa K. Lalnghinglova, Secretary, Education Department a thawh lai a chhim bial a fan \umin Lunglei-a kal pahin ka kal ve a. Thenzawl khawchhung kan luh \an lai chuan mak tak maiin engemaw hian ka thauvah min man a. Tlan paha Thenzawl ram leh a khua kan kaltlang lai chuan, “Hei ngei hi Zofate khawpui tur chu a nih hi,” tiin Pu Lala chu ka hrilh a. Chu khawpui lo din huna a awmdan tur ka dawnte chu ka hrilh mawlh mawlh a. A ni pawh chuan midangte pawhin Thenzawl hi khawpui pawimawh tak a nih tur thu an dawn thu leh an sawi thute min hrilh a.

Vety Department-a thawktuten ei in tur an lo siam sakte eiin kan chawl a. Vety Department-a thawktute chu Thenzawl khaw chanchin ziahna min lo lakkhawm sak turin ka ngen a. Haw lamah kan tlawh phei a, Article min lo khawnkhawm sak chu min pe a. Chung Article ziaktute pawh chuan Thenzawl khaw leilung inrem dan- Kawng, Mual, Lui, Phai leh Tlang te chu khawpui mawi leh ropui tak dinna tura khuanu remruat sa diam ang mai a nih ziate chipchiar takin an ziak a. Heng Article bakah titi-a Thenzawl ramah hian Kolkata khawpui ang chu a leng han han ang tia sawite pawh an awm.

Thenzawl Zofate khawpui atana din turah hian Pathian in thil tih tur (vision) min pe ve a. Pakhatna chu Zofate Hnam Lungphun a ni a, a dang leh chu Zofate Pathian Biak Inpui sak a ni. A pathumna chu Zofate khawpui awmdan tur ruahmanna siam a ni.

Pakhatna Zofate hnam lungphun :

Zofate hnam-a harh tur leh Inpumkhat tur chuan bul thuhmun, thlahkhat leh hnam khat kan nih tih hi thu maia sawi lovin a taka chantir a ngai tih ka dawng a. Chuta tan chuan kan vaia hnam leh chi peng hrang hrang hming ziahna lung Zofate hnam lung phun tur a ni. He hnam Lungphun hmang hian kan hnam nihna (true national Identity) dik tak chu khawvel hmaah kan puangin kan pho chhuak tawh ang a. He Lungphun hmang hian hnam kaihthawh a ni ang a, hnam-ah kan chiang vek tawh ang. Khawvel pawhin hnam khat leh thlahkhat Zofate vek kan ni tih an hre tawh dawn a ni.

Pahnihna Zofate Pathian Biakinpui :

Zofate hi Kristian deuh vek kan ni a. Chu Kristianna chu pakhat a nih laiin pawl hrang (denomination) hmangin kan in \hendarh a. Kum 100 chuang pawl hmanga kan in \hendarhna chu pumkhata siam a pawimawh a. Kan Inpumkhatna turin kan vaia Pathian biak nana kan in hman \awm theih tur Biakinpui ‘Zofate Pathian Biakinpui’ kan nei ang. Chu Biakinpui chu HNATLANG hmangin Zofaten kan sa ang. He Biakinpui sak dan tur hi kum 20 hmalam khan ka dawng daih tawh a. He Biakinpui hi a neitu chu Zofate kan nih dawn avangin Kohhran pawl hrang hrangte pawhin Inkhawmpui nante pawh hman theih a ni ang. Khawvela Biakin Lian ber chu khawvel khualzinte hipkhawmtu- Thlarau, Rilru leh Taksa damna an channa Biakinpui tur a ni dawn a. Khawvel hnam chi tinte'n Lal Isua Krista Chanchintha Zofate kal tlangin an dawnna hmunpui (mission centre) a la ni ang.

Pathumna Zofate khawpui ruangam :

Lalpan min hmuh tir ve dan chuan Zofate khawpui Thenzawl chu khawpui mawi leh ropui tak a ni ang. Khawvel ram lian leh chang kang- America, United Kingdom, Australia leh Israel ten an thiamna (Technology) leh sum (Finance) hmangin min la rawn dinpui ang. In lehlo neilote pawhin mahni In tur ram lei chawpa sak chawp ni tawh lovin ram changkangte tih angin saksa kan duh ang leh leitheih tur kha thla tina rulh turin (mortgage) emaw, man pek tlakin kan lei tawh mai ang. Zofate khawpui tur hi tuna kan mitthla bak piahlam daiha mawi, \ha leh ropui a ni dawn a. Khawvel ram laili a Zofate khawpui chu Zofate fuan khawmna tur leh khawvel mit fukna tur a la ni ang.