Chanchin thar thenkhat :

Hri kai 231 hmuchhuak tawh

Mizoram-ah COVID-19 hri kai mi 231 hmuh-chhuah an ni tawh a, mi 151 enkawl dam an ni tawh thung. Sawrkar thuchhuah tarlan danin niminpiah khan ZMC Laboratory-ah Sample 94 enfiah niin heng atang hian hri kai hmuhchhuah 4 awmin heng te hi NDRF mi leh sa, State pawn atanga rawn lut leh NDRF Camp, Lungverh-a awmlai an ni a, niminpiah-a Lunglei TrueNat Laboratory-a Sample enfiah zingah hri kai an awmlo thung. Heti hian Mizoram-ah COVID-19 hri kai hmuhchhuah hi mi 231 tling tawhin mipa 142 leh hmeichhia 89 an ni a, hri kai hmuh-chhuah zinga Champhai District mi pakhat chu nimin khan dam-a chhuahtir niin hri kai enkawl dam mi 151 an tling ta bawk a, tunah hian hri kai enkawllai 80 an awm mek a ni.

Adviser to CM in tlawh

Adviser to Chief Minister, C. Lalramzauva chuan nimin khan Bairabi Rail Station-a Stockyard leh Zophai-a IR Border Out-Post te tlawhin Bairabi Rail Station kaltlanga thing thawn-chhuah thin chu COVID-19 hrileng inkharkhipna avangin duh angin kalpui theih a nih rih loh thu a sawi a, Saw Mill Licence pekchhuah a, chak zawk leh hlawk zawk a heng kan ram hausakna te hi hman a nih theih nan Sawrkarin hma a lak mek thu a sawi bawk. Ministry of Environment, Forest & Climate Change, North Eastern Regional Office atangin January leh May, 2020 chhungin thing Rail Wagon 588 thawnchhuah phalna hmuh a nih laiin ram pum a inkharkhip kalpui a nih tak avangin wagon 254 chiah thawnchhuah hman a ni a. Wagon 334 thawnchhuahna hun hi September thla thleng pawhsei leh niin thing tum 1,31,669 bawr vel la awm anga chhut a ni.

Chhungkaw 11 khunghrang

Tunhnaia an khaw mi in Qurantine Centre a awm alo tlawhpawh avanga Chhingchhip VLTF ten an khuaa Total Lockdown an kalpui hnuah Quarantine Centre-a awm mek lo tlawh-pawh tu in alo tlawhpawh chhungkaw 11 te chu mahni In lamah inkhunghrang tura tih an ni a, Quarantine Centre-a awm hi a Sample Test result a chhuah hma chuan Lockdown hi kalpui a ni ang.

Dan bawhchhia man tam tawh

Nimin thleng khan Mizoram-ah The Mizoram (Containment and Prevention of Covid-19) Ordinance, 2020 bawhchhia mi 18,610 man an ni tawh a, heng mite pawisa chawi tlingkhawm chu Rs. 37,50,400/- a tling tawh bawk. He dan bawh-chhia man zinga 10,775 te hi Police te man niin Flying Squad ten mi 6299 an man tawh a. Local Task Force ten mi 1536 an man tawh bawk.