HSSLC-2020 Exam result tihchhuah niin zirlai zaa 78.52 in an pass

Mizoram Board of School Education (MBSE) chuan kumin a pawl 12, Higher Secondary School Leaving Certificate (HSSLC) Exam result chu nimin tichhuakin zirlai Exam zawng zawng atanga 78.52% in an pass a, kum hmasa aiin 0.42% in result a chhe zawk a ni.

HSSLC Exam result tihchhuah chungchangah hian MBSE Chairman, Lianhmingthanga chuan chanchinbu mite kawmin, “HSSLC Exam COVID-19 in min tihbuai avangin Exam zo thei lova kan awm reng hnuah vawi hnih Exam thulh leh a ni a, chumi hnuah result kan tichhuak thei hi a lawmawm hle,” a ti a. Science Subject-a Topper, Lalremsiama Darchhun S/o Vanlalpeka, Tanhril chu kum 2018 HSLC Exam-ah Topper lo ni tawhin Science-ah vek Topper a nih thu a sawi lang bawk.

Kumin-a HSSLC Exam-ah hian Exam tura inziaklut mi 12,609 zingah mi 12,324 in an exam a, zirlai 9,677 pass in 2,551 an Failed thung a, Exam Form Fill-up zingah 285 zet exam lehlo awmin Exam lai-a hnawhchhuah erawh an awmlo thung. Kumin hian mipa aiin hmeichhe lam Exam beitu an tam zawk leh a, Exam hmachhawntu hmeichhia 6,591 an awm laiin mipa 5,733 an awm a, Distinction-ah mi 431 an pass a, First Division-ah mi 2,806, Second Division-ah 4,049, Third Division-ah 2,391 an pass a, Compartmental Chance nei 96 awmin zirlai zawng zawng pass vekna School 38 awmin Failed vek School pahnih an awm bawk.

Arts Subject bikah zirlai Exam tura inziaklut 9,731 zingah zirlai 9,470 in Exam beiin, mi 7,377 in an pass a, Distinction-ah mi 258, First Division-ah mi 1,750, Second Division-ah 3,092 leh Third Division-ah 2,277 pass in Compartmental Chance nei mi 77 an awm a, mi 2,016 an failed a, pass percentage hi 77.90% a ni. Arts Subject-ah hian Top 10-ah mi 13 langin, Christina Lalchhandami d/o Lalrawna, Greenland HSS chuan mark 500-ah 454 hmu in pakhatna a ni.

Science Subject-ah zirlai exam tura inziaklut 2,283 zingah zirlai 2,267 in exam beiin, mi 1,800 in an pass a, Distinction-ah mi 117 pass in, First Division-ah mi 880, Second Division-ah 754, Third Division-ah 49 in an pass a, Compartmental Chance nei mi 19 awmin, zirlai 448 an Failed a, Pass Percentage chu 79.40% niin Science-ah hian Top 10-ah mi 11 langin Lalrem-siama Darchhun S/o Vanlalpeka St. Pauls Higher Secondary School, Aizawl te chuan mark 470 hmu in pakhatna an ni bawk.

Commerce Subject-ah zirlai Exam tura inziaklut 595 zingah zirlai 587 in Exam beiin mi 500 in an pass a, Distinction-ah mi 55 pass in, First Division-ah mi 175, Second Division-ah 202, Third Division-ah 68 in an pass bawk. Compartmental chance nei mi 3 awmin, mi 48 an Failed a, Pass Percentage 89.94% niin Top 10-ah mi 11 langin mark 455 hmutu Lalhriatpuia Ralte s/o Lalthanpuia, St. Joseph HSS Aizawl chu pakhatna a ni.

Arts zirna School inrelbawlna hrang hrangah Dificit School titha berin 86.72% in an pass a, Govt. School 71.65%, Aided School 82.98%, Lumpsum School 80.4%, Private School 80.59% leh Private Candidate 31.27% in an pass a. Science Subject-ah pawh Dificit School titha berin 86.07% in an pass a. Private School in dawtin 83.95% in an pass a. Govt. School 64.76%, Aided School 53.33% leh Private Candidate 36.84% ten an pass a ni. Commerce subject-ah Private candidate 100% pass in, Private School te 95.15% in an pass a, Dificit School 90.37 leh Govt. School 66.08% in an pass bawk a ni.

Compartmental chance nei te tan hian August 11, 2020 khian Exam buatsaih leh a ni dawn a, July 28 thlengin Form fill-up theih a ni ang.