Latest News

Thenzawl-ahTask Force ten FIR an thehlut

Tunhnaia Lawngtlai-a Quarantine tur, hri an vei tih hmuhchhuah te zalen taka an khawsak theih dan chhui-a Dan an bawhchhiatna ah an chunga Dan anga Action lak a nih theih nan nimin khan Thenzawl Town Task Force Committee chuan Thenzawl Police Station-ah FIR an thehlut.
Thenzawl Town Task Force Committee in an Chairman, R. Lalramnghaka hming-a FIR an thehluh-ah hian June 29, 2020 khan Lawngtlai District mi, Quarantine tur ten zalen taka an Quarantine-na tur hmun an panna kal kawngah Thenzawl Field Veng-a Jon Jon Restaurant-ah chawlin, thil eiin he Restaurant opposite a Dawrte-ah thil an lei bawk tih tarlangin, heng mite hi Lawngtlai an thlen hnuah COVID-19 vei/positive an ni tih finfiah a nih thu leh hei hian Thenzawl mipui a ti chiai hle tih an tarlang a.
Heng mite zalen taka an duh dan dan a kalkawnga an khawsa thei chu Dan bawhchhiatna nia an hriat thu leh Sawrkarin inkhunghrang (Quarantine) tura a tih an ni tih hrereng chunga midang himna tiderthawng leh midang nunna atana hlauhawm an thlen leh mi an tithlabar a, midang harsatna an thlen avang hian Dan an bawh-chhiatna leh midang tana pawi an thlen dan chu chhui chhuah a, Dan anga an chunga Action la turin an ngen a ni.
Hetihlai hian he thil thleng avanga mi 12 te Swab Sample lak chu niminpiah khan ZMC Laboratory-a enfiah a nih hnuah an vai hian hri an kai lo tih hriat niin ni 5 hnuah an Sample te hi lak leh tura ruahman a ni bawk.
Thenzawl-ah hian nimin khan Thenzawl Town Task Force Committee chu thukhawmin an khawchhunga Lockdown kalpui mek chung-chang an sawiho a, mipui harsatna nasa zawk a thlen lohna turin Lo leh ram lama hnathawh ngai tak tak tan Task Force phalna lak theih nise an ti a, mamawh lamkhawm ngai te tan pawh Task Force te remtihna in dawr hawn phal a ni bawk.

Comments

Popular News (Last 30 Days)