COVID-19 chungchanga sawrkar hmalakna thlirho; Mipui-a hri a darh loh nan hmalak dan tur rel a ni

Health Minister, Dr R.Lalthangliana hovin nimin khan Mizoram-a COVID-19 dinhmun thlirhona neih a ni a, mipui zinga he hri hi a darh lohna tura invenna atan State pawn atanga lirthei rawn lut enkawltute endik tur leh Sipai te pawhin hri an thehdarh lohna tura ruahmanna siamchungchang te sawiho a ni.

Secretariat Conference Hall-a he thutkhawm ah hian Health Minister, Dr. R. Lalthangliana chuan COVID-19 dona kawnga thawktu zawng zawng te chungah lawmthu sawiin, Department tin te an che tha hle ni-a a hmuh thu a sawi a. Tunhnaiah District tin a fanchhuah thu leh an hmalak dante a hriatpui thu sawiin, inthlahdul lova tanmar erawh a tul hle a ni, a ti. Health Minister chuan tangkhang a hlawma haw huk an awm tawh lova, lo lut tur pawh an tam tawh lo nia a lan thu sawiin, mahni mimal motor-a zankhaw tairekah leh zing khawvar hmaa haw thin te chungchang thu erawh ngun lehzuala ngaihtuah a ngai, a ti a. Mizorama awm mek Sipai leh Para-Military Force - Assam Rifles, BSF, CRPF leh a dangte chungchang thu leh loh theihloh avanga phai lam mi, Mizoram-a hnathawk tura chahluh ngaite chungchang thu te ngaihtuah uluk a ngai hle, a ti bawk.
He hunah hian tunhnaiah Lunglei-a BSF te leh Aizawl-a NDRF awm mekte zinga COVID-19 positive engemawzat hmuhchhuah an nih chungchang chu sawichhuah niin mipui-ah an putdarh lohna tura khirh leh khauh taka ruahmanna felfai kalpui nise an ti a. Sipai leh Para-Military Force-te zingah Quarantine an kalpui tha tawk em tih leh COVID-19 laka invenna tur ruahmannate an zawm tha tawk em tih en a, khauh lehzuala kalpui tha an ti a. Mizoram sawrkar leh mipui mamawhna avanga phai atanga Mizoram-a mithiam chahluh ngai awm thin ah heng mite hi hun reilote chauh Mizorama awm tur an nih avangin an pual hian manchawia an inkhunghranna tur leh Mizo-ram-a an awm chhunga hri an put darh lohna tura inkaihhruaina (SOP) fel tak duana zawm tir ngei ni bawk se an ti a ni.
Hei bakah hian tangkhang ni si lo, thil pawimawh dang avanga State leh State inkara veivak te, District leh District inkara veivakte chungchang sawiho niin natna an thehdarh loh nan ruahmanna felfai zawk duan tul an ti a. Mipui zinga he hri hi a darh lohna tura invenna kawng pawimawh tak pakhat atan State leh State inkara veivak thin Driver leh Handyman te zingah Random Test neih tha tiin a tul angin sawrkarin ruahmanna siam se an ti bawk.

Comments

Chhiar Hlawhte