Latest News

Vaccine pe chhunzawm dawn

 Serchhip District chhunga Health Care Workers te hnena COVID-19 Vaccine, Covishield pek hna thawh mek chu Inrinni leh Pathianni te chawlh anih hnuah Vawiin hian Vaccine pekna tura ruahman hmun thum-ah pek chhunzawm a ni leh dawn a, thudawn danin Serchhip District chhunga mi 450 te hri danna pek turah ni 2 chhung khan mi 306 te chu hri danna hi pek hman an ni a, Presbyterian English School leh Midland M/S-ah mi 121 ve ve te hri danna pek ni tawhin Thenzawl CHC-ah mi 64 te hnenah hri danna hipek an ni tawh bawk a ni.

Thalaite tan MYC leh Bank hotute an thukhawm

COVID-19 hripui leng avanga rampawn atanga Mizo thalai rawn haw leh an hna chan ten leirem an lo rah leh theih nan Mizoram Youth Commission (MYC) leh Bank thuneitute chuan nimin khan Aizawl-a Planning & Programme Implementation Department Conference Hall-ah thutkhawm an nei a, Deputy Chief Minister Tawnluia chuan a kaihruai a ni.
He thutkhawm ah hian Deputy Chief Minister chuan COVID-19 hripui leng avangin India ram khawpui hrang hranga Mizo thalai hna chan avanga lo haw tam tak an awm thu leh lo haw tur pawh an awm mek thu sawiin, Mizoram sawrkar chuan Mizoram Youth Commission (MYC) kaltlangin Mizoram chhunga Financial Institution te nen tangkawpa eizawnna an neih theih nan enge tih theih awm tih te, hmalak theihna a awm em tih te ngaihtuah tlang tura he thutkhawm hi koh a nih thu a sawi a. Sawrkar chuan Soft Skill Training pe mah se bultan tha leh tur chuan a tam zawkin sum leh pai-ah harsatna an neih theih avangin Mizoram chhunga Financial Institution/Bank hrang hrang te an pawimawh thu sawiin, an Scheme neihsa bakah sawrkar nen tangdunin kawng dap dan a awm thei em tih te chu ngun taka ngaihtuahna seng turin a ngen bawk.
He hunah hian Mizoram Youth Commission (MYC) Chairman, Dr. Vanlaltanpuia MLA chuan State pawna fehchhuak MYC-a in report te hnen atanga an thu dawn danin, thlatina an sum lakluh thin cheng vbc. 3.45 lai a tlin thu leh hei hian Mizoram economy chu nasa takin a nghawng ang tih rin theih a ni tih a sawi a, hei vang hian MYC chuan a rang lama hmalak chu tul a ti takzet tih a sawi a. Thalai hna chan rawn haw te zingah mi tlemte chauh COVID-19 hripui leng a reh hnu pawha hnazawm leh thei tur an ni tih sawiin, zaa 90 aia tam hi chuan an hna hi an chan hlen dawn a ni, a ti bawk.
He Meeting-ah hian UCO Bank aiawhte hnen atangin MUDRA loan, cheng nuai 10 thleng an pek theih thu te, COVID-19 hripui leng avanga harsatna tawk Mizo thalai hna chante chu ngaihsak an lo nih bik tur thu te ngaihthlak a ni a. Mizoram Rural Bank (MRB) hotute chuan MRB in ‘Post COVID-19 Plan’ a siam thu te sawiin, IBPS kaltlanga MRB-a Assistant post ruak te pawh Online Application hmangin thalai hna chan, Graduate si ten ngaihven se a tih thu an sawi a. Mizoram Co-operative Apex Bank (MCAB) pawhin thalai hna chan lo haw te an tui zawng hriat nan inhmuhkhawmna siam nise, chu mi mila hmalakna siam nise an ti a. Axis Bank leh HDFC aiawhte chuan Branch thar an hawn turah Graduate chin thawk tur an mamawh thu te leh Graduate lo tan pawh thawh tur a awm thu te an sawi a. Bank hrang hrangten Provisions an neih te sawrkar hnena thehlut tura pawm tlan a ni bawk.

Comments

Chhiar Hlawhte