Mizoram-ah hri kai 6 hmuh belh leh a ni

Niminpiah khan ZMC Laboratory-ah COVID-19 Sample 49 enfiah niin hri kai mi 6 hmuhchhuah an ni a, an zinga mi 5 chu mipa niin hmeichhia pakhat a tel bawk.
Sawrkar thuchhuah tarlan danin heng hri kai hmuhchhuah te hi Aizawl District mi 5 leh Siaha District mi pakhat niin Aizawl District mi 5 te hi NDRF, Lungverh-a awm; Madhya Pradesh, Andhra Pradesh, Manipur leh Assam atanga lo kir niin midang pakhat (Ardali) erawh COVID-19 vei nena intawh atanga kai a ni a, Siaha District atanga hri kai hmuhchhuah hi Delhi atanga rawn haw a ni thung a, an vai hian kum 23 leh 54 inkar niin Symtom neilo leh Quarantine Centre-a awmlai an ni. Hetihlai hian nimin khan Mamit COVID Care Centre-a hri kai enkawl zinga mi 6 te chu an hriselna dinhmun a that tawh avangin chhuahtir an ni thung.
Report hnuhnung ber-a a lan danin Mizoram-ah hian COVID-19 hri kai hmuhchhuah hi mi 197 an tling ta a, heng te hi mipa 110 leh hmeichhia 87 niin an zinga mi 139 te chu enkawl dam ni tawhin tunah hian enkawllai mi 58 an la awm mek a, Kolasib, Serchhip, Khawzawl, leh Saitual bakah Hnahthial District-ah te hri kai enkawllai an awm tawh lova, Aizawl District-ah mi 26, Siaha District-ah mi 14, Lunglei District-ah mi 8, Lawngtlai leh Mamit District-ah mi 4 ve ve leh Champhai District-ah mi 2 te enkawl mek an la ni a, District hrang hrang zingah Aizawl District-ah hri kai hmuhchhuah an la tam ber a ni.

India-ah hri kai hmuhchhuah nuai 7 chuang ta
India rama COVID-19 hri kai hmuhchhuah chu nuai 7 an tling ta a, hetihlai hian hri kai zinga nunna chan pawh mi sing hnih an tling tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan rampumah Sample 2,41,430 enfiah leh niin heng atang hian hri kai 22,252 hmuhchhuah leh an ni a, heng te nen hian hri kai hmuhchhuah zawng zawng chu 7,19,665 tling tawhin July ni 1 atanga ni 6 chhungin hri kai hmuhchhuah thar 142,747 zet an awm tawh a ni.
India ramah hian darkar 24 kalta chhung khan hri kai zinga mi 15,515 te chu dam-ah puan ni bawkin heng mite nen hian hri kai zingah mi 4,39,947 te chu enkawl dam an ni tawh a, hri kai zawng zawng atanga chhutin enkawl dam hi zaa 61.13 an tling tawh a, tunah hian mi 2,59,557 te chu enkawl mek niin hri kai enkawllai aiin enkawl dam hi 180,390 in an tam zawk a ni. Darkar 24 kalta chhung vek khan hri kai te zingah nunna chan 467 awm leh bawkin heng te nen hian hri kai zingah nunna chan 20,160 an awm tawh bawk a, hri kai atanga chhutin zaa 2.80 in nunna an chan a ni.

Comments

Chhiar Hlawhte