State sum in kawng siam dawn

Chief Minister, Zoramthanga chuan tun dinhmunah Bairabi Bypass kawng thawmthat hna chu State sum a thawh rih a ni ang, a ti.

He thu hi nimin-a Sairang NH-54 leh NH-154 kawng dinhmun leh Bairabi Rel chawlhhmun a enfiahna ah sawiin Chief Minister chuan tun dinhmunah helai kawng thawmthat hna chu State sum a thawh rih a ni anga, hemi rual hian FCI Godown leh Railway inkar kawng, meter 150 vela thui pawh Truck trip 10 vela hnawh mai theih a nih avangin hmanhmawh thilah PWD te chu chawpchilh taka hma la nghal turin a chah a, chumi chhungin Railway thuneitu te chu Silchar atanga lung chang tha ngaihtuah turin a chah bawk. Chief Minister chuan tun dinhmunah Rail wagon 50 unload loh a ding a, Rail Wagon hi darkar 7 chhung a thlawna din theih niin, hemi bak chu state sawrkar chawi tur pawh thuneitute a biak tur thu a sawi.

Chief Minister hian, Sairang road Buichali bul kawng chhe lai te, Kawnpui leh Khamrang inkar kawng chhia te tlawh nghalin; helai hmun hi Central atanga lirthei hmanga endik hna thawh phawt ngai a nih avanga hma la thei lo an ni a, tun dinhmunah hna thawh theih nan Central thuneitu te phalna lak tawh nimah se, hrileng avangin hmalak theih ala nih loh thu a sawi. Chief Minister hian Sethawn-a After Care Centre a tlawh bakah, Kawnpui pumpelh a tlang kawng tan tawi theihna tur kawng thar a thlithlai nghal bawk.