Sports Minister ten Video Conference an nei

Nimin khan Union Sports Minister, Kiren Rijiju hovin Sports Ministers Video Conference neih niin COVID-19 avanga harsatna chungchanga Sports Ministry tan lak dan sawiho a ni a, Olympic 2028-ah chuan India in Top 10 position a chan ngei theih nana tanlak dan turte sawiho a ni.

Mizoram aiawha he Video Conference-a tel Sports Minister, Robert Romawia Royte chuan Mizoram Sawrkar leh mipuiin Sports leh thalaite hmasawnna an ngaihpawimawh avangin Sawrkarin ‘Mizoram Sports Policy 2019’ a duang thar tih a sawi a, Sports chu Industry dinhmun ah hlangkaiin Mizoram State Games pawh mumal taka kalpui chhoh tan a nih bakah infiammi te tan Sawrkar hna lak tur zawng zawngah zaa 5 (5%) chu Infiammite tan hauhsakna dan siamthar a ni, a ti.

Hei bakah hian Sports Minister chuan Union Minister, Kiren Rijiju hmalaknaa Khelo India Programme herrema siamthat a ni chho mek chu lawmawm a tih thu sawiin, COVID-19 dona kawngah Mizoram NSS, NCC leh Bharat Scouts & Guides ten theihtawp an chhuah thu a sawi a, Sawrkar bakah YMA te leh Kohhran ten COVID-19 dona kawngah nasa takin hma an la a, Mizo nuna bet tlat Tlawmngaihna hlutzia alang chhuak nasa a ni, a ti bawk.

COVID-19 avangin Competition tih theih a nih loh thu pawh Sports Minister chuan sawiin, chuti chung chuan Fit Mizoram hmalaknain Home Fitness Programme nung taka kalpui a ni a, mi tam takin anmahni inchhungah exercise an la a, Governor leh Chief Minister te pawh midang tihhmuhtu an ni, a ti a. Online Jump Rope Competition buatsaih tum a nih thu pawh sawiin, Union Sports Minister chu Jump Roper thiam tak anih anga Online a tel ve turin a sawm bawk a ni.