Aizawl-a Quarantine Facility hmun te tlawh

Consultative Committee on Health & Family Welfare Department chuan nimin khan an Chairman leh Health Minister, Dr. R. Lalthangliana hovin Aizawl khawpui chhunga Government Quarantine Facility thenkhat tlawhin an dinhmun an enfiah.
Consultative Committee on Health & Family Welfare Department hian SIRD Hostel, Durtlang Leitan tlawh hmasa berin Falkland-a Rajiv Awas Yojana (RAY) building-a BSF sipai quarantine mek te leh R. Dengthuama Hall bakah Mission Vengthlang-a SAI Hostel te an tlawh a, heng Quarantine Centre hrang hrangte hi Medical Team in an vil reng a, Quarantine Facility a khunghrante hi khunghran an nih atanga ni 5 - 10 inkarah Swab Sample laksak thin an ni a, Quarantine hun ni 14 an hman zawh hnuah an Sample Test result negative a niha insawiselna an neihloh chuan In lamah uluk taka Self Monitoring ti turin an chhuahtir thin a ni. Heng Quarantine Centre te hi COVID-19 Committee on Psychological & Social Guidance member ten uluk taka vil rengin naupang Quarantine mekte inawmtleina turte bakah rilru lama harsatna neite a tul ang angin Counselling an pe thin a. Quarantine Centre-a awmte hian ei leh in lamah sawisel an neilo bawk a ni.
Consultative Committee chuan Quarantine chungchang hi fimkhur leh khauh lehzuala kalpui tul an tih thu sawiin, Mizoram pawn atanga lo haw te chu a theih chin chinah Aizawl-a Quarantine thin nise tha an tih thu an sawi a, R. Dengthuama Hall an chhuahsan hnua Aizawl pawna haw tur an nih chuan an hawna tur District leh khua bakah an paltlang tur District thuneitute nen tangho a lo vil chhunzawm te pawh tula an hriat thu sawiin, R. Dengthuama Hall atanga hawng turte pawh sawrkarin an zawm tur dan a siamte chu anmahni mai bakah midangte tana himna tur a nih tel avangin uluk tak leh fimkhur taka zawm ngei ngei turin an duh tih an sawi a. Vairengte Screening Point an thlen atangin Mizoram sawrkar dan siam khauh taka an zawm a ngai tih sawiin, mimal lirthei-a lo haw te pawh an chawlhna leh ei leh in thlengin khua leh tui tha an nihna angin fimkhura, dan zawm tha turin an chah a ni.
Consultative Committee chuan Quarantine Facility hrang hrangte enkawl danah lungawithlak an tih thu sawiin, Mizo mipuiten sawrkar thupek an zawm that vangin State dang nen khaikhinin COVID-19 vei pawh kan tlem hle a ni, an ti a. Mizoram-a COVID-19 vei mek 79 zinga 64 (81%) chu hnamdang Sipai, Para-Military Force te an ni tih sawiin, an ni pawh fimkhur lehzual turin an chah nghal a. COVID-19 Committee on Psychological & Social Guidance te hmalakna fakawm an tih thu sawiin, COVID-19 chungchang bakah lirnghing vanga thlabarte hnem tura an fehchhuakte chu thil ropui tak a ni, an ti bawk.

Comments

Chhiar Hlawhte