Serchhip-a MHIP Branch hrang hrang ten MHIP Day midangte tanpuina atan an hmang

Nimin July 6, 2020 kha Mizo Hmeichhe Insuihkhawm Pawl (MHIP) Day vawi 46-na a ni a, Serchhip-a MHIP Branch hrang hrangte chuan an remchan ang theuhin an hmang.

MHIP Day vawi 46-na pual hian MHIP Sub-Hqrs. Serchhip President, Sanghmingliani chuan MHIP Member te chibai bukin duhsakna a hlan a, MHIP Day chu kumdanga chuan hlim takin nghakhlel takin an hman thin thu sawiin, kumin ah erawh chuan hri leng avanga hman ho theih a nih takloh thu leh lungchhiatthlak a tih thu a sawi a. He hri hlauhawm leh tihbaiawm tak hi sawrkar thuchhuak te kan zawm thata kan fimkhur chuan kan hneh thei a ni tih hriaa theihtawp chhuaha fimkhur zual zel turin an member te chu a ngen a ni. Kumin ah MHIP Day chu a huho in hmang theilo mah se Branch hrang hrang ten MHIP Motto hre rengin an Branch huamchhung theuh ah tangkai taka an hman avanga lawmawm a tih thu pawh a sawi a. MHIP Sub-Hqrs. Serchhip hmalakna te tarlangin, Beti Bachao Beti Padhao hnuaiah ‘Hmeichhia te chhanhim la, lehkha zirtir uar rawh’ tih hnuaiah hma an lakna te leh Swadhar Greh Home enkawl-a an hmalakna te a sawi bawk.

MHIP Day pual hian Serchhip Town chhunga MHIP Branch 19 te chuan an remchan dan anga hun hmangin Serchhip Field Veng Branch, Serchhip Saron Branch, P&E Veng Branch leh Darnam Branch MHIP te chuan inkharkhipna kalpui a nih mek avangin MHIP Day pual hian hun an hmanglo thung a ni. Serchhip Dinthar Branch MHIP te chuan MHIP Day pual hian an member damlo leh harsa bakah kum 80 chunglam te hnenah thilpek hlanin Serchhip Chhim Veng Branch te pawhin an member damlohna tawk te an kan bawk a. Serchhip Vengchung Branch MHIP te chuan an member damlo an kan bakah Serchhip District Hospital Poor Fund-ah Rs. 1000/- an hlan a, Serchhip Kawnpui Bazar Branch te chuan Serchhip District Hospital leh Mercy Hospital-a damlo awmte leh Beiseina In (Old Age Home)-ah Artui leh theitui an sem bakah an member damlo leh harsa mi 3 te hnenah thilpek an hlan bawk.

Serchhip Kawnpui Branch MHIP te pawhin an member harsa te tanpuina hlanin Serchhip Hmar Veng Branch MHIP te pawhin vengchhung-a miharsa mi 8 te hnenah thilpek an hlan a, IOC Veng Branch MHIP ten an member damlo kanin Thlamuana In (Swadhar Greh)-ah thilpek an hlan a, New Serchhip Venglai Branch MHIP ten an huamchhung khawlai thenfai hna thawkin New Serchhip Bazar Branch MHIP ten an member harsa leh damlo te kanin Old Age Home leh damdawi In ah thilpek an hlan a, Bukpui Branch MHIP ten vengchhung leh Park thenfai hnatlang an nei bawk. Chhiahtlang-a MHIP Branch pathum, Lianchhiari Branch, Pi Hmuaki Branch leh Saikuti Branch te chuan hnatlang neiin khawlai leh kawngdung thenfai hna an thawh bakah damlo leh an member harsa te tanpuiin an member kum upa te hnenah thilpek an hlan bawk.