Serchhip District-a VC inthlanpui neiha hman tur Electoral Roll siam hna thawh tan leh a ni

Mizoram-a Village Council inthlanpui neih tur atana hman tur Electoral Roll siamthat hna chu nimin khan thawh tan a ni leh ta a, hemi chungchangah hian nimin vek khan Serchhip-ah District Bawrhsap, Kumar Abhishek IAS hovin thutkhawm neih a ni bawk.

Serchhip DC Meeting Room-a thutkhawm ah hian Bawrhsap, Kumar Abhishek chuan VC Electoral Roll, 2020 ennawn mek chu COVID-19 avangin an hmalakna te engemaw chen kaihhlak mahse tun dinhmunah Electoral Roll ennawn leh siam hna te pawh kalpui theih a lo ni leh ta chu lawmawm a tih thu a sawi a, khawtlang hruaitute leh Political Party hruaitute nena hemi chungchang hi sawiho a, harsatna an tawhte pawh a tul anga sawiho tura Meeting hi koh anih thu sawiin, Electoral Roll dik leh felfai tak siam anih thei nana theihtawp chhuahpui tur leh thawhpui turin a sawm thar nghal bawk.

He hunah hian Election Officer, Vanlalhmachhuana chuan VC inthlanpui atana hman tur Electoral Roll siamthat hna an lo thawh tawh dan tarlangin, kumin March 13 khan Draft Electoral Roll tarchhuakin Electoral Roll-a hming thun, paih leh siamthat dilna hun te pawh khar a nih tawh thu leh, siam that ngaite chu ERO leh AERO ten siam tha in tun thla ni 29 khian Final Electoral Roll tihchhuah anih tur thu a sawi bawk.

VC inthlanpui neih tur atana Electoral Roll siam hna thawh mekah hian Serchhip District chhungah hian Village Council 54 awm tura ruahman niin heng VC hrang hrangte tana Electoral Roll hi siam mek a ni a, tuna Serchhip-a VC dinglai zingah Chhiahtlang VC chu VC pahnih ah then tur niin Chhiahtlang North leh Chhiahtlang South tih a ni anga, Serchhip Chanmari Veng VC leh Serchhip Darnam Veng VC te ding tharin a hmaa Sub-Village, Vanchengte pawh VC thar a ni tawh dawn a, tunhmaa Serchhip District-a awm ngailo Kanghmun South leh Zote South VC te pawh Serchhip District hnuaiah hian an awm tawh dawn bawk a ni.

Nimin-a thutkhawm hian District chhunga ERO leh AERO te bakah tlawmngai pawl hrang hrang aiawh, Political Party aiawhte leh chanchinbu mi aiawhte an tel a. VC Electoral Roll siam mek chungchanga zawhna leh chhanna hun hman a ni bawk.