Chanchin thar thenkhat :

COVID-19 dona atan hlan

Hindustan Unilever Limited chuan Food & Drugs Administration, Directorate of Health Services Aizawl chu COVID-19 dona kawnga theihtawp an chhuah avangin COVID-19 do nan Hand Sanitizer bur 505 leh Hand Wash bur 100 an hlan a. Hindustan Unilever Limited te hian Food & Drugs Administration te chu COVID-19 laka mipuite himna tura Hand Sanitizer siam chhuahna kawngah te theihtawp an chhuah tih hriain he thilpek hi an hlan a ni. Heng Hand Sanitizer leh Handwash te hi Mizoram-a an Agent F. Kap-sanga Enterprise aiawhin Zosangliana leh Lal-remsanga ten Lalsawma, Joint Director, Food & Drugs Administration, Directorate of Health Services hnenah an hlan a, heng bakah hian Hand Sanitizer bur 500 dang lo thleng leh tur a awm mek bawk a ni.

Pelican Crossing System peih

Aizawl Smart City Ltd. leh Aizawl City Traffic Police tangkawp buatsaih Traffic Light hmanga kawng kanna (Pelican Crossing System) chu Ai-zawl khawpui chhung hmun 10-ah bunfel a ni ta a, naktuk-ah a hlanna hun hman a ni ang. Pelican Crossing System hi mipui hnena hlan a nih hnuah chuan Pelican Crossing System awmna hmunah chuan mipui kawng kan dan leh lirthei chetvel dan chu Traffic Lights (Red, Green) hmangin Traffic Police- ten an kaihruai tawh dawn a ni.

ODF+ ah Thenzawl puang

Serchhip District-a Thenzawl Town chu pawnler-a inthiar awmlohna hmun leh vantlanga inthiarna hmun nei tha, Open Defecation Free Plus (ODF+) ah puan a ni. Thenzawl SDO (Civil), Kulothugan A, Chairman, Thenzawl Town Sanitation Task Force ni bawk chuan niminpiah khan Thenzawl ODF+ anih thu hriattirna hi a tichhuak a, he dinhmun ni thei tur hian Thenzawl Town huamchhunga vantlang inthiarna te chuan ODF Plus ni tura tehfung an phak a, hemi chungchanga sawiselna nei duh an awm chuan ni 15 chhungin sawiselna thehluh theih a ni bawk ang.

Bank hnathawh dan thlirlet

Nimin khan Lunglei-ah District Consultative Committee/District Level Review Committee/District Level Security Committee chu thukhawmin nikum December thla atanga kumin March thla tawp thlenga an District chhunga Bank hrang hrang hmalak dan an thlirlet a. Hemi hun chhunga Loan ten sum an dawn atanga Loan an pekchhuah, CD Ratio chu 53.22% a nih thu tarlan a ni. Nikum sawrkar kum chhung khan Lunglei District-ah hian mi 275 hnenah PMEGP Loan cheng nuai 583.96 pek niin mi 3078 hnenah Agriculture Loan cheng nuai 2472.71 pek a ni a, sumdawng mi 1957 hnenah MSME Loan cheng nuai 5866.23 leh mi 11 te hnenah Educational Loan cheng nuai 61 pek a ni.

ITI Building sak zirchiang

Mizoram Legislative Assembly hnuaia Committee peng pawimawh tak, Public Accounts Committe (PAC) chuan nimin khan an Chairman, Lalduhoma MLA hovin Champhai Zote-a ITI Building sak chu tlawhin an zirchiang a, a hmunhma leh In sak dante an enfiah hnuah Labour Employment, Skill Development & Entrepreneurship (LESDE) Department Official-te leh Contractor-te chu kawmin, an thil hriat duh leh mamawh angte an zawtfiah nghal bawk. Nimin-a helai hmun tlawhtu PAC ah hian member dang 4 pawh kalin Vawiin hian Serchhip rawn panin Chhiahtlang-a ITI Building sak mek chu an tlawh nghal ang.