Serchhip District Bawrhsap thar in a hna a zawm

Serchhip District Bawrhsap kalchhuak tur, Dr. Lalzirmawia Chhangte chuan nimin khan Bawrhsap thar tura ruat, Kumar Abhishek, IAS hnenah Bawrhsap mawhphurhna a hlan ta.
Serchhip District Bawrhsap thar tura ruat, Kumar Abhishek, IAS hian nimin zing khan Aizawl atanga Serchhip rawn thlengin nimin chawhma lam khan Bawrhsap kalchhuak tur, Dr. Lalzirmawia Chhangte nen Serchhip-a Bawrhsap Pisa-ah an inkawm a, hemi hnu hian Bawrhsap Pisa-a Officer dangte nen inkawmin hemi hnu hian Bawrh-sap mawhphurhna hi an inhlan fel nghal a, Bawrhsap thar hian a Pisa hi luah nghalin Bawrhsap kal-chhuak tur pawh hian nimin chawhnu khan Aizawl lam a pan nghal a ni.
Serchhip District Bawrhsap thar, Kumar Abhishek hi Delhi chhuak niin kum 2016 khan IAS-ah a tling a, AG-MUT Cadre niin Oct., 2018 atang khan CEO, Mizo-ram-ah attached niin MLA General Election leh MP Lok Sabha Election te neih fel a nih hnuah West Phaileng-ah SDO (Civil) in a awm zui leh a. Chumi hnuah Addl. DC Aizawl-ah dah leh niin kumin June ni 18, 2020 khan Serchhip DC hna chelh tur hian sawrkar chuan a rawn dah a, nimin khan a hna thar hi a zawm ta a ni.
Serchhip District Bawrhsap thar, Kumar Abhishek hian a nupui, Neetisha Verma chuan a rawn tawiawm a, a nupui hi IRS niin Assistant Commissioner of Custom, Mizoram, hna a chelh mek bakah Asst. Commissioner of Custom, Manipur mawhphurhna pawh a chelh mek a, nimin vek khan Serchhip DC Bungalow chu an luah nghal a ni.

Comments

Chhiar Hlawhte