July 15-ah School Academic Session tan theih a ni dawnlo - Education Minister

School Education Minister, Lalchhandama Ralte chuan July 15,2020-a School Academic Session tan tura ruahmanna lo siam tawh chu Ministry of Home Affairs-in COVID-19 vei pung chho zel avangin India ram pumah July 31 thleng zirna la tan rih loh tur a tih avangin kaltlangpui theih a ni dawn rihlo tih a sawi.

School Education Minister, Lalchhandama Ralte hian nimin khan a bial, Darlawn khua tlawhin amah lo hmuaktu khawtlang hruaitute hnenah he thu hi a sawi a, School Education Minister chuan School luh veleha zirna kalpui thei turin Department chu a inbuatsaih zel tih sawiin, School luh theih loh chhung a rei avang hian zirlaiten nun kawng an bo loh nan nu leh pate chu inchhungkhurah nun dan phung an fate zirtir thin turin a sawm a. A theih ang anga Moral Education uar turin a sawm a ni. School Education Minister chuan Ministry of Home Affairs-in COVID-19 vei pung chho zel avangin India ram pumah July 31 thleng zirna la tan rih loh tur a tih avangin kaltlangpui theih a ni dawn rihlo tih sawiin, “School luh hun tur chu kan ram boruak a zirin la ruat leh a ni ang,” a ti bawk.

Education Minister chuan COVID-19 lockdown avanga zawhfel theih loh HSSLC exam leh HSLC Compartmental Exam te nimin-a zawhfel theih a ni ta chu lawmawm a tih thu a sawi a, Exam buaipuitute leh thawktute zawng zawng chungah lawmthu a sawi a. Nimin-a zawhfel Exam result chhuah hun tur pawh sawiin Minister chuan, CBSE in July 15,2020-ah result an tihchhuah dawn avangin July 15 aia tlai lova result tihchhuah tum anih thu a sawi a. Hei hi India ram hmundanga zirna zawm duhte an khawtlai loh nana ruahman anih thu a sawi bawk.

He hunah hian Sports Minister, Robert Romawia Royte pawhin hun rei tak COVID-19 avanga hnathawk thei lova Sawrkar leh mipui kan awm avangin mipuiin sum leh pai leh ei leh barah pawh harsatna kan tawk nasa tih sawiin, Pathian zara COVID-19 hri a lo reh chhoh mek lai hian hmasawnna hnathawh tan chhoh theih a beiseiawm tih a sawi a. Budget-a hnathawhna tur atana sum awm sa Bank-ah te emaw dah tang mai mai lova a hmanna tur atana ruahman sa thawh zung zung chu Sawrkar sum-in miretheite hnen a thlen theih dan tur anih avang leh Central Sawrkar atanga sum tam zawk hmuhbelh theihna anih avangin dan phal chhungah hmalak zung zung tul a tih thu a sawi bawk.

Nimin a Darlawn tlawhtu School Education Minister leh Sports Minister te hi Er. H. Lalzirliana MLA chuan tawiawmin Darlawn khawchhunga hmun hrang hrang- Darlawn Multi Sports Centre, Tourist Lodge, GSA playground Darlawn, Higher Secondary School te, PHC leh Police Station-te an tlawh kual a, thuamthat dan tur leh cheibawlzui dan turte enin Darlawn PHC-ah hian PPE, Hand Sanitizer leh Glove te an pe nghal bawk.