Chanchin thar thenkhat :

Rangva sem tur vailiam

Nimin khan Mamit bialtu MLA, Er. H. Lal-zirliana chuan a bial mipui chhungkaw harsa te tan inchung tur Rangva sem tur a vailiam. Heng Rangva vailiamna puala inkhawm tawi neih ah Mamit bialtu MLA leh Road & Infrastructure Development Board Vice Chairman ni bawk, Er. H. Lalzirliana chuan a bial chhung khaw hrang hranga khuarel chhiatna avang leh Inchung thawmthat ngai bakah Rangva Inchung la nei phalo tam tak te tan Inchung tha an neih theihna tûrin MLA-LAD Fund atangin chhungkua engemaw zat tan Rangva hi sem tura ruahman a nih thu a sawi a. Hemi hnu hian Lengpui Petrol pump atangin a vailiam nghal a ni. Mamit bialtu MLA, Er. H. Lalzirliana chuan COVID-19 hrileng avanga a bial mipuite tan chet lak zung zung a theih loh avangin pawi a tih thu sawiin, engtiklai pawhin a bial mipui tanpui ngaite pui turin a inring reng tih a sawi bawk.

Mi 12,532 te rawn haw tawh
COVID-19 Task Group on Migrant Workers & Stranded Travellers in an chhinchhiahna atanga a lan danin rampum-a inkharkhip kalpui a nih avanga Mizoram-a rawn haw duh in hriat-tir chu mi 14,401 an tling tawh a, tunah hian mi 12,532 te chuan Mizoram rawn thleng tawhin kawng laka rawn thang mek mi 75 an awm a, tunah hian la rawn haw tur mi 1869 an awm bawk a ni. Tun thlengin Mizoram-a rawn haw tawh mi 11667 te chuan inkhunghran hun hmang zo tawhin mi 865 te chu inkhunghranna hmunah an la awm mek a ni. Hetihlai hian Mizoram-a ramdang mi tangkhang, an chenna lama thawn haw tur mi 75 an la awm a, a tam ber hi Myanmar-a haw tur niin mi 47 zet an ni.

CM Relief Fund-ah chhunglut
Mizoram Govt. Doctors Association Member te chuan an hlawh atanga zaa 10 an thawhkhawm, Rs. 40,00,395 chu nimin khan COVID-19 hri leng dona atana hman turin CM Relief Fund-ah an chhunglut.

Inkhawm thei bituk sut duh
MPC Party thalaite chuan thuchhuah siamin Hripui leng mek karah pawh Kohhran zing tawngtai inkhawm neih chhunzawm leh an pawisak loh laia inkhawm thei tur zat bithliah a ni chu Kohhrante thamlohna leh palzûtna lian takah an ngai tih an sawi a. Mi 50 aia tam Zing tawngtai inkhawma kallo tura thupek siam tawh chu a rang thei ang bera sut turin sawrkar thuneitute an phut bawk.

Lungawilohna lantir dawn
National Health Mission (NHM) Contractual Association Mizoram (NCAM) chuan Mizoram sawrkar-a an thilphut chi hrang hrang, an hlawh hren mek pek te thildang te nawrna atan Vawiin atanga tun thla ni 10 thleng khian Badge dum belin lungawilohna an lantir dawn a, NHM hnuaiah hian Mizoram-ah thawktu 1665 an awm mek a ni.

Comments

Chhiar Hlawhte