Serchhip District-ah inkhunghrang 1027 awm tawhin mi 999 chhuahtir an ni tawh

COVID-19 hri leng avangin nimin thleng khan Serchhip District-ah inkhunghrang mi 1027 an awm tawh a, heng zinga 999 te chuan inkhunghranna hun hmang zovin chhuah zalen an ni tawh a, mi 28 te inkhunghranna hmunah an la awm.

Serchhip CMO Office atanga thu kan dawn danin COVID-19 hri leng avang hian Serchhip District-ah kumin March 10 khan In lama inkhunghrang awm tanin hemi atanga nimin thleng khan inkhunghranna hi kalpui chhunzawm zel a ni a, tun thlengin inkhunghrang mi 1027 awm tawhin mi 999 te chuan inkhunghranna hun hmang zovin inkhunghranna hmuna awm mi 28 an la awm mek a, heng mite hi Quarantine Facility-a awm mi 25 leh Didicated COVID Health Centre (DCHC)-a awm mi 3 te an ni a, an zinga pahnih hi Serchhip atanga hri kai hmuhchhuah te an ni a, midang pakhat hi hri kai hmuhchhuah ZMC-a enkawl dam tawh a ni thung.

Thudawn danin Inkhunghrang zinga mi 468 te hi mahni In lama inkhunghrang niin heng zingah hian chhungkua-a khunghran te pawh awmin an vai hian inkhunghranna hun hmang zovin chhuahtir vek an ni tawh a, Vantlang hmun leh Kohhran hmunhma, hmun 6-a inkhunghrang mi 164 awmin heng te pawh hi chhuahtir vek an ni tawh a, Sawrkar hmunhma, Govt. Quarantine Facility Centre-a inkhunghrang mi 394 awm tawhin heng zinga 367 te chu hri lakah fihlima chhuahtir niin Govt. Quarantine Facility Centre-a awm 2 te chu hri kai an nih avangin DCHC-ah dahluh leh an ni a, Quarantine Facility-a awm lova Isolation-ah dah nghal mi pakhat a awm bawk.

Serchhip District-a inkhunghran kalpui mekah hian nimin khan Thenzawl Tourist Lodge-a inkhunghrang mi 4 te chu an inkhunghran hun a zawh avangin chhuahtir an ni a, hetihlai hian P&E Rest House, Bukpui-ah mi 4 bawk dahluh leh niin nimin vek khan Sample enfiah tur 23 te chu ZMC Laboratory-ah thawn a ni bawk.

Hetihlai hian Mizoram puma inkhunghranna hmunah mi 15,001 dahluh an ni tawh a. Sawrkar Quarantine Facility-ah mi 9436 dah ni tawhin Isolation-ah mi 515, Community Quarantine Facility-ah mi 3905 leh mahni in lama inkhung hrang (Home quarantine) mi 1082 bakah Hotel leh man chawia inkhunghranna hmunah mi 63 khunghran an ni tawh a. Heng khunghran te atang hian mi 12,700 chu chhiahtir ni tawhin Sawrkar Quarantine Facility atangin mi 8101, Isolation atangin mi 437, Community Quarantine Facility atangin mi 3402 bakah Home Quarantine mi 710 leh man chawia inkhunghrang mi 50 chhuahtir an ni tawh a ni. Tunah hian sawrkar inkhunghranna hmuna inkhunghrang mi 1179 la awmin Isolation-ah mi 78, Community Quarantine Facility-ah mi 471 In lama inkhunghrang mi 372 bakah, man chawia khung hranna hmunah hian mi 13 an la awm mek bawk a ni.