Serchhip-ah SEDP kaltlangin Kel vulh tanpuina semin Sangha chi hralhchhuah a ni

Mizoram sawrkar Flagship Programme, SEDP kaltlangin nimin khan Serchhip District chhunga Kel vulhtute hnenah tanpuina semchhuah niin Sangha khawitute hnenah man tlawm zawkin Sangha chi hralhchhuah a ni.

SEDP kaltlanga Kel vulh tanpuina semna hun hi Serchhip DVO Office Chamber-ah neih niin he hunah hian Serchhip DVO, Dr. C. Zarzokima chuan tanpuina sem kawngah a ti tak tak tur chauh pe thei tura sawrkarin thuneihna pek thu sawiin, Party bil induhsakna in a tibuai lo chu lawmawm a tih thu a sawi a. Serchhip District-ah Kel sa thahnem tak a awma; chhungkaw tam takin innghahna atana an hman a duhsak thu pawh sawiin, tanpuina sum an pekchhuah chu tam tham lo mah se tangkai taka hmang ngei turin tanpuina dawngtute a chah bawk. He hunah hian AH&Vety Department, Serchhip-a Veterinary Officer, Dr. H. Vanlalrawna chuan Kel vulh chugchanga hriattur pawimawh zual sawiin, Kel chu a hnute pawh ngaihsan bik leh chak bik, Damdawi atan pawha tha a nih thu leh Camel hnute te nen angkhat-a ngaih a ni thu a sawi a, a bik takin Kelpui dum hnute a chak bik nia sawi a nih thu a sawi a. Kel In sak dan turah pawh ft. 4 leh ft. 5 bial-ah pakhat zel cheng tur anga ngaih a nih thu te leh Fur laiin an damlo awlsam avanga enkawl ngun lehzual a tul thu te a sawi bawk.

Nimin-a Kel vulh tanpuina sem hi Serchhip, North Vanlaiphai, Thenzawl leh Baktawng-a Kel vulhtu ten dawngin Kel In sakna tur Rs. 5220/- pekchhuah phawt an ni a, hemi hnu hian Kelpui 10 leh a pa pakhat lei nan Rs. 50400 pekchhuah leh an ni anga, a thawh thumna ah thil tul danga hman turin Rs. 3780/- pekchhuah leh an ni ang.

Nimin vek khan Fisheries Department kaltlangin SEDP hnuaiah Serchhip-a Sangha khawitute tan man tlawm zawkin Sangha chi hralhchhuah a ni a, Sangha chi te hi Serchhip District Fisheries Development Officer (DFDO) Office atanga hralhchhuah niin tun tuma Sangha chi semchhuah hi a thawhkhatna niin Common Carp chi hralhchhuah a ni a, Sangha chi hi duh khawp hmuh a ni lo tih Serchhip DFDO, Lucy Lalrinpuii chuan sawiin, Serchhip District chhunga khaw hrang hranga semchhuah khawp pawh an hmuhloh thu leh a vaiin 78,486 hmuin hei hi chhungkaw 171 te hnenah hralhchhuah a nih thu a sawi. Serchhip DFDO chuan Sangha chi lei duh turte hi a hma lamin Serchhip District chhunga Circle hrang hrangah an lo in zawh lawk tawh thu sawiin, heta in report te hnenah hian hralhchhuah a nih thu leh zaa 50 Subsidy pek a nih thu sawiin, Sangha khawitute hian pakhat Rs. 1.75/- zela an lei thu a sawi a. Tuna an sem bakah hian thla thar-ah hian a thawh hnihna atan hralhchhuah tur hi neih leh theih an beisei thu sawiin, hetah hi chuan khaw hrang hrang ah pawh phurhchhuah theih tawh an inbeisei thu a sawi bawk.