Bazar building hawn tan a ni

Kumin March 23-a rampum-a inkharkhip kalpui a nih atanga khar tawh Serchhip Bazar Building chu ni 102 zet hnuah nimin khan hawn tan a ni leh ta.

COVID-19 hri leng avanga Mizo-ram-a inkharkhip kalpui a nih, March 23, 2020 atanga khar tawh Serchhip Bazar Building hi sawrkar ruahmanna ang leh Serchhip-IV VLTF ruahmanna siam angin nimin atang khan mipuite hman theih tura hawn a ni leh ta a, he Bazar khar a nih chhung hian Bazar-a chawhmeh leh Sa zuar thin te chu hmundang ah thutna pek niin Bazar chung lamah Readymade leh Secondhand zuar thinte erawh chu sumdawnna kalpui thei lovin an awm a, amaherawh chu Mizoram-a hri kai hmuhchhuah thar an tam tawhloh avang leh hri kai hmuhchhuah te pawh enkawl dam chhoh zel an nih avanga sawrkar in zangkhai zawka inkhar-khipna a kalpui hnuah nimin atang khan hawn a ni leh ta a ni.

Ruahman ang chuan Bazar building-a thil lei tur leh kal turte reng reng chu Bazar tual, Chawhmeh zawrhna Gate lam atanga luh tur niin a chhuak turte reng reng Sa serna lamah chhuah tur a ni anga, Bazar chhunga lut tur ten Mask hman vek tur niin midang nena inhlat, Social Distancing ngaih pawimawh bawk tur a ni ang.

Hetianga sawrkar in Bazar building chhunga inzawrh a phal leh ta chu Bazar hmuna thil zuar thin te chuan lawmawm an tih thu leh sawrkar chungah an lawm thu sawiin, man chawi-a Bazar building luah thin te chuan hetianga dawr an inhawn theihloh chhung hi chu Dawr luahman chawi lo tura an inngaih thu an sawi bawk.