Chanchin thar thenkhat :

Dan bawhchhia tam tawh

Kumin May 4-a The Mizoram (Containment and Prevention of Covid-19) Ordinance, 2020 hman a nih hnuah nimin thleng khan he Dan bawhchhia mi 14,778 man an ni tawh a, heng mite pawisa chawi pawh Rs. 31,60,700/- zet a tling tawh bawk a ni. The Mizoram (Containment and Prevention of Covid-19) Ordinance, 2020 bawhchhia man zinga 9317 te hi Police Duty te man niin an pawisa chawitir tlngkhawm chu Rs. 22,65,000/- a ni a, Police Flying Squad ten mi 3925 man tawhin an pawisa chawitir tling-khawm chu Rs. 6,86,300/- a ni thung a, Local Task Force ten mi 1536 man tawh bawkin an pawisa chawitir chu Rs. 2,09,400/- a ni bawk.

Khunghran 1674 la awm
Mizoram pawn atanga rawn haw te inkhung-hranna hmun atana buatsaih, Quarantine Facility hrang hrangah awm an tlem chho zel a, mi 1674 chauh khunghran an nih tawh. Task Group on Quarantine Facilities atanga thudawn danin, COVID-19 hri leng avang hian Mizoram-ah khung-hran mi 15,268 awm tawhin heng zinga mi 13,406 te chuan inkhunghranna hun an hmang zo tawh a, heng zinga mi 8546 te chu sawrkar Quarantine Facility-a awm niin, mi 3620 te chu Community Quarantine Facility (CQF) a mi niin, mi 724 te chu mahni-a inkhunghrang te an ni a, mi 50 te chu Hotel-a inkhunghrang an ni a; mi 466 te chu Isolation Facility-a awm an ni bawk. Tuna inkhunghrang mek mi 1674 zinga mi 869 chu sawrkar Quarantine Facility-a awm an ni a, Community Quarantine Facility (CQF)-ah mi 308 an awm bakah Isolation Facility-ah mi 69, mahni In-a inkhunghrang (Home Quarantine) mi 406 leh Hotel-a inkhunghrang mi 22 an awm bawk.

Civil Hospital Aizawl tlawh
Health and Family Welfare Board Vice Chairman, Dr. Z.R Thiamsanga chuan nimin khan Civil Hospital, Aizawl tlawhin, COVID-19 hripui leng kara sawrkar hmalakna hrang hrang te a hmunah a en a. Sawrkar hmalakna a khum 20 awm theihna tur ICU leh NICU tuna awmsa bak siam mek peih tep a ni ta leh hripui leng mek kara mipuite mamawh hre reng chunga hetiang a sawrkarin hma a la chu lawmawm a tih thu a sawi a. Labour room tha zawk a awm theih nana ruahmanna kal mek te leh sawrkar hmalakna siam mek inzaina hmanrua ur thianghlimna te peih tep a ni ta chu lawmawm a tih thu a sawi bawk.

CM in hlawh chhunglut
Chief Minister, Zoramthanga chuan June thla a a hlawh (Basic Pay) atanga zaa 60), Rs.48,000 chu nimin khan COVID-19 hripui leng dona atan Chief Minister's Relief Fund-ah a chhunglut a. Nimin thleng khan Chief Minister's Relief Fund-ah hian cheng vbc. 19.55 zet lut tawhin heng atang hian Rs. 10,33,49,200/- chu hmanchhuah a ni tawh a, sum hman bang vbc. 9.21 ala awm mek a ni.

Truenat khawl atan sanction
Committee on Utilisation of Chief Min-ister's Relief Fund for COVID-19 in alo rel tawh angin District Hospital hrang hranga hman tur Truelab Quattro Real Time Quantitative Micro PCR Machine (Truenat) 10 leina turin CM Relief Fund atangin Health & Family Welfare Department hnena Rs. 2,01,15,000 sanction order chu Ningani khan tihchhuah a ni.

MPYCC in Work Order hal
COVID-19 hrilen mek laia MNF Sawrkar in party Worker-te tana contract hna a sem duh loh lantir nan Congress party \halai, Mizoram Pradesh Youth Congress Committee (MPYCC) chuan nimin khan Aizawl-a Congress Bhavan kawt-ah Work Order Copy an hal a. He hunah hian MPYCC President, Dr. Lalmalsawma Nghaka chuan hrileng avanga mipuiin harsatna kan tawh lai leh hrek beh kan nih lai leh sawrkar hnathawkte hlawh bat sak an nih mek laia, MNF Sawrkarin mipui hmaizahna nei miah lova party Worker te sem tura Contract hna \hahnem tak an sem chu lungchhiatthlak an tih thu sawiin Work Order Copy hi an hal zui a ni.

Comments

Chhiar Hlawhte