“Sawrkar hnathawkte pawisa an puk sak hrih hi khawiah nge an thehthang?” - MPYCC

Mizoram Pradesh Youth Congress Committee (MPYCC) chuan, “MNF Sawrkar hian Sawrkar hnathawkte pawisa an puk sak hrih hi khawiah nge an thehthang?” tiin Sawrkar hnathawkte hlawh pek tur harsat avanga sawrkar mualphona tur hliahkhuh nana COVID-19 chhuanlam atana sawrkarin a hmang chu zep lova puang law law tura an phut thu an sawi.

Nimin a thuchhuah an siamah MPYCC chuan inrenchemna nei miah lova MNF sawrkarin sawrkar hnathawk an lak vak vak avangin sawrkar hnathawk hlawhah sawrkar sum a kal duak duak nia sawiin, “Kum 2018 aiin 2020-a sawrkarin a hnathawk te hlawh atana a sum sen hi cheng nuai 132735 chuangin a pungchho a. Hei hian sawrkar sum dinhmun a ti chhe em em a ni,” an ti a. Kum 2020 atana ram rotling tur hmasawnna hnathawhna tur sum dah chu 2018 aiin cheng nuai 29322 in a tlem daih zawk nia sawiin, “Sawrkar sum harsat chhan bera COVID-19, Pu Zoramthanga'n a han puh daih te hi Congress Thalai chuan nuihzatthlak a ti hle a ni,” an ti.

Sum harsatna hi hripuiin kan ram a tihbuai hmaa thil thleng a nih thu MPYCC thuchhuah chuan tarlangin, “He hripui hi MNF sawrkar mualphona khuhtu remchang tak niin a lang,” an ti a. Kum 2018-a 7th Pay-a sawrkar hnathawk hlawh pung tur zat mithiamten an chhut dan chuan cheng vbc. 563 a nih thu leh Congress sawrkar kum hnuhnung, kum 2018 khan sawrkar sum hmuh (revenue receipt) chu sawrkar hmanchawp (revenue expenditure) aiin a tamna (revenue surplus) 6.90%, cheng vbc. 1533 a tling hial nia sawiin, “MNF sawrkar hnu kum khat liam lek, 2019 khan sawrkar sum hmuhin a hmanchawp a daih ta lo. Hei vang hian sawrkar sum chu a lo deficit ta in, indaihlohna(Revenue Deficit) hi 2.24% (Rs. 594.73 Crore) kum khat chhung lekin an nei hman a ni,” an ti bawk a. Budget pumpuia sum hmuh (Total Receipt)-in sum hmanral (Total Expenditure) a daihlohna Fiscal Deficit pawh Finance Commission-in a hlauhawm china an tuk 3% aiin a chanve chauh 1.59% (Rs. 352.93 crore)-in kum 2018-ah a tlakhniam hman laiin MNF in sawrkarna kum 1 lek an chan chhungin a hlauhawm chin 3% let thum, 8.34% (Rs. 2215.09 Crore) in a pung niin an sawi bawk.

MPYCC thuchhuah chuan COVID-19 hripui hi lo thleng lo pawh nise tun sawrkar hi nikum 2019-a a kal dan ang kha chuan sawrkar hnathawk hlawh hi an neih daih a rinawm loh tih an tarlang a, “Sawrkar hnathawk hlawh hi hripui avanga sawrkar sum mamawhna avanga cut/bat sak nia ngaih a nih laiin, an hlawh chungchanga buaina hi sawrkarin sum a lakluh tlem tual tual laiin, sum hmanna pun belh tur zawnga chein, sawrkar hnathawk lak belh a bansan si lo, sum lakluh mil lova khawsak tihsan hi Financial Management thiamlo te chet dan a ni,” an ti bawk.