NCAM ten Badge dum bel an titawp ta

National Health Mission Contractual Association Mizoram (NCAM) chuan sawrkar laka lungawilohna lantira Badge dum an bel mek chu nimin atang khan an titawp tih an sawi.

Hemi chungchanga thuchhuah an siamah NCAM chuan kar kalta Zirtawpni, July 3 atanga an lungawilohna lantira Badge dum an bel chu Health Minister, Dr. R. Lalthangliana kaihhruaina hnuaia Health Department hotute nen an sawiho hnuah an ngenna anga April atanga June, 2020 thla hlawh an lak nghal theih nan Finance Department lamin NHM pawisa token a pek sa, cheng vbc. 13.31 pekchhuah a rem tih sak leh July 7, 2020-a cheng vbc. 12.29 chu hlawh atana hman tura NHM account-ah pekluh a ni chu Finance Department changtu Chief Minister, Zoramthanga leh Health and Family Welfare Deartment changtu leh Mizoram Finance Department te chungah an lawm hle tih an sawi a. Hei bakah hian Ministry of Health & Family Welfare in Record of Proceeding (RoP), 2020-21(FY) approval a pek anga hlawh leh hlawhpunna pek a rem tih sak bawk tih an sawi bawk.

An thilphut dang, Regular post ruak a awmin NHM hnuaia thawktute Ministry of Health & Family Welfare duhdan anga a ngheta luh theih dan tur ruahmanna sak tura an ngenna pawh Minister in remchang hmasa ah sak a tiam avangin nimin, July 8, 2020 atang khan lungawilohna lantir nana Badge dum an bel chu an titawp ta rih tih an sawi bawk.