Saitual District-ah chhawmdawlna semchhuah a ni

COVID-19 dona atana mi inphal ten Saitual Bawrhsap hnena an chhunluh tlingkhawm Rs. 5,06,500 chu nimin khan chhungkaw harsa chhawmdawl nan sem chhuah a ni.

COVID-19 hrileng dona tura a tul anga hman tura Kohhran, Tlawmngai Pawl leh mimal thahnemngai ten Saitual Bawrhsap hnena June ni 23, 2020 thlenga an chhunluh tling-khawm Rs. 5,06,500/- hi Saitual District chhunga Group YMA 6 kaltlangin chhungkaw 117 chhawmdawl nan semchhuah a ni a. Chhawmdawlna semchhuahna puala inkhawm tawi Saitual District Bawrhsap Pisa tual-a neih ah Bawrhsap chuan tlawmngai pawl hrang hrang NGO, Kohhran leh mimal inpe ten midangte tana malsawmna ni tura thilpek hlu tak pe-a an luangchhuak thin chu lawmawm a tiin an inpekna a hlu hle a ni, a ti bawk.

Chhawmdawl ngai Group YMA ten an report danin Saitual Group Branch 18-ah chhungkaw 40, Tuivai Group-a Branch 12-ah chhungkaw 30, Tuiphal Group-a Branch 7-ah chhungkaw 21, Kawlkulh Group-a Branch 4-ah chhungkaw 8, Sialkal Group-a Branch 4-ah chhungkaw 12, Chalfilh Group-a Branch 2-ah chhungkaw 6 te niin chhungkaw pakhat hnenah hian Buhfai, Tel, Dal leh Sabawn sem niin Rs 2,500/- hu theuh pek an ni.