Mobile Phone atanga loneih leh a kaihhnawih hrang hrang hriat theihna tur ‘Loneitu’ tlangzarh a ni

Loneituten awlsam taka Mobile Phone atanga loneih leh a kaihhnawih hrang hrang, an tangkaipui tur hriat theihna Mobile App 'Loneitu' tih chu nimin khan Agriculture Minister, C. Lalrinsanga chuan a tlangzarh.

Agriculture Committee Room, Aizawl-a he Mobile Apps tlangzarhna ah hian Agriculture Minister chuan khawvel changkang chho zelah IT, thiamna thar leh Mechanization te loneih lamah leh loneitute hman tangkai theih thil ngaituah chhuah leh hman a pawimawh tih sawiin, hengte hian hlawkna piah bakah awlsam zawka kawng hrangah loneitute tan hmasawnna a siamsak thei a ni, a ti a. Tuna Mobile Apps tlangzarh tak chu lawmawm a tih thu leh Zoram loneitu zawng zawngin hmang tangkai se a duh thu sawiin, hun harsa kan tawh mek laiin Pathian malsawmna kan dawn theihna tur atana hmanraw tangkai nise a duh thu a sawi a. COVID-19 hripui leng leh inkharkhipna in loneitute tan harsatna nasa takin a thlen tih sawiin, loneitute harsatna chu Department harsatna a ni tih hriain Department chuan a theih ang angin harsatna sutkian nan hma a lak thu leh heng zinga Farmers’ Helpline chu loneitute an hmang tangkai hle niin a hriat thu a sawi bawk a. Sawrkar flagship programme SEDP hnuaiah Mizorama a vawikhatna atan Vaimim chin tam tum a nih thu leh Department in beiseina sang tak a nei tih sawiin, Thal ah Be chi hrang hrang chin a hmalak tum anih thu a sawilang bawk.

Mobile App tlangzarh tak, 'Loneitu' tih hi Agriculture Department leh i-Bridge Firm tangkawpa siam niin Play Store atanga install tawh chuan internet hmang lo pawha loneih kaihhnawia hriat duhte en zung zung theihna a ni a, thlai chin dan hrang hrang, thlai chi mamawh zat, thlai thar chhuah theih zat, thlai hmun enkawl chhunzawm dan, thlai ven dan leh thil dang dang hriat theihna a ni. Heng bakah hian Agriculture leh a kaihhnawih chanchin thar chhiar tur a awm anga, loneitu hlawhtling chanchin te, Agriculture Department enkawltu Official te Phone number hriat theihna a nih bakah khawl hmanga loneihna hmanraw zuartute, thlai chi leh leitha zuar (Dealer-te) inkawhhmuhna a ni bawk. Kum engmaw zat kaltaa thlai thar tawh zat te, Zoram hmun hrang hranga ruahtui tla zat record te pawh a en theih bawk ang.

He Mobile App-ah hian loneituten an lo neih chungchanga Official-te hnena rang taka report an pek theihna 'Thil tul Report-na' dah tel a ni a, thlai eichhetu, Sazu emaw, Pangang emaw, Khau emaw puang thut pawh rang takin an report thei dawn a ni. He Mobile App hi hun lo kal zel turah a tul anga tihchangtlun zel tum a ni.