Sairang-a FCI Kudam satu tur thlan fel niin Khawzawl-ah FCI Kudam sak leh tum a ni

Consultative Committee on Food Corporation of India (FCI), Mizoram Chairman leh Rajya Sabha MP, Ronald Sapa Tlau chuan tun dinhmunah FCI-in Mizoram-ah buhfai a chhekkhawl hnem tawk thu sawiin, “Ramrikawn-a FCI Kudam chhawk zangkhaitu tur, Sairang Dinthar Veng-a FCI Kudam satu tur pawh thlan a ni tawh,” a ti.

Tun thla ni 18-a Mizoram Rajya Sabha MP atanga chawl tur, Ronald Sapa hian nimin khan Aijal Club-ah thuthar thehdarhtute kawmin tun tum hi Consultative Committee on FCI Chairman anga a hun hnuhnung tur a ni tih sawiin, “FCI leh Supply Department-te thawhhona that avangin tun thlengin harsatna nei lovin kan awm a, a lawmawm hle. Ka hun chhungin tlinglo tak chungin theihtawp ka chhuah ve a ni,” a ti a, ngaihnathiam ngaihna tam tak a neih ngei tur thu a sawi bawk.
Consultative Committee on FCI-a Chairman chuan Mizoram-a FCI Kudam hrang hrangah buhfai chhekkhawl Quintal nuai 2 vel a awm thu sawiin, “Fur lai a ni chungin kan dinhmun a tha. Lo la thleng leh mai tur Quintal 18,000 chuang a awm a ni. COVID-19 leng tur tuman an hre lawk lova, inralrin hman a ni lo. Keimahni lam pawhin harsatna kan nei tam. COVID-19 avangin sawrkar laipui ruahmanna hnuaiah PMGKY hnuaiah a thlawnin buhfai sem a ni a, sem zel a la ni dawn,” a ti a. April, May leh June khan PMGKY hnuaiah hian a thlawnin buhfai quintal 3340 theuh a vaiin, quintal nuai 10,230 sem a ni tih pawh sawiin, hei bakah hian COVID-19 avanga Mizorama tangkhangte hnenah May leh June khan quintal 3340 ve ve sem a nih thu a sawi bawk.
Hun rei tak an buaipui tawh Sairang Dinthar-a FCI Kudam sak tur chu a hlawhtlinna hmuh chhoh a nih thu sawiin Ronald Sapa chuan, “Central PWD kutah dah a ni a, anni hian a satu tur Contractor pawh an thlang tawh,” a ti a, COVID-19 vangin hna an la thawk lo tih sawiin, “Hei hi sak zawh a nih hun chuan Ramrikawn-a FCI-in harsatna a siamte a zawng zawngin chhawk lo mah se, nasa takin a chhawk dawn a ni,” tiin Sairang-ah hian buhfai quintal nuai khat leng tur Kudam sak a nih dawn thu he hunah hian a sawi bawk.
Mizoram khawchhak lam Champhai leh Khawzawl District chawmtu tur Kudam sak a nih dawn thu pawh sawiin Rajya Sabha MP chuan, “Khawchhak lam chawm thei tur Kudam sak hi kan duhna a rei tawh. Mahse, duh duhin Kudam hi sak ngawt theih a ni lova, sawrkar laipui pawmpuina a ngai zel a ni,” tiin tunah chuan FCI hian Kudam sak phalna hi an pek tawh thu a sawi a, Champhai leh Khawzawl District chawmtu tur FCI Kudam hi Khawzawl-ah sak a nih tur thu a sawi bawk.

Comments

Chhiar Hlawhte