NHM hnuaia Contract-a thawk ten Badge dum an bel

National Health Mission (NHM) hnuaia Contract-a thawkte chuan an hlawh hrensak thin an nih vanga lungawilohna lantir nan nimin atang khan an hnathawhna hmunah Badge dum belin lungawilohna an lantir.

Hemi chungchanga thuchhuah an siamah National Health Mission Contractual Association Mizoram (NCAM) chuan, tunlai COVID-19 hrileng vanga mitin an buai lai hian hah taka thawktu damdawi lama thawktute zingah a tam ber chu National Health Mission (NHM) hnuaia thawktute an ni, an ti a. NHM hnuaia thawkte hian kum engemaw zat harsatna an lo tawk tawh tih sawiin, an hlawh pawh a hun takah an la ngai lova, a chang phei chuan thla 6 lai te hlawh la thei lovin an awm thin tih an sawi.

NHM hnuaiah hian hna hrang hrang thawk - Doctor, Nurse, Health Worker, Laboratory Technician, Pharmacist, X-Ray Technician, Driver leh Office Staff engemaw zat, an zavaiin 1,665 an awm thu pawh tarlangin, kum 2013-14 atanga NHM pawisa State sawrkar Treasury kaltlang a nih atang khan pawisa hi rei tak tak State sawrkar hian a hreng thin nia sawiin, Central sawrkar inkaihhruaina Dan ah chuan ni 15 chhungin NHM Account-ah pekchhuah thin tur a nih thu an sawi a. Kum 2019-20 chhunga NHM tana Central sawrkar atanga pawisa lo kal leh State sawrkar tum tur zaa 10 atangin tun thleng hian cheng nuai 3,865 chu Mizoram sawrkarin a la hreng tih an sawi a, hemi anih avang hian NHM hnuaia thawktu tam zawk chuan kumin May leh June thla hlawh an la thei lova, thenkhat chuan April atangin hlawh an la thei tawhlo niin an sawi bawk.

NCAM thuchhuah chuan April atanga June thla hlawh an lak nghal theihna turin NHM pawisa an hren hi pe chhuak nghal tur te, Ministry of Health & Family Welfare-in a phalsak anga hlawh leh hlawhpunna a la pekloh te pe nghal tur leh Regular post ruak a awmin NHM hnuaia thawktute chu Ministry of Health & Family Welfare duhdan anga a ngheta luh theih dan tur ruahmanna siamsak turin Mizoram sawrkar chu an ngen a. An ngenna te hi tihlawhtlin phutin nimin atanga karleh Zirtawpni thleng an hnathawhna hmunah Badge dum belin an lungawilohna an lantir dawn tih tarlangin, hemi chhung ngeia an ngenna te tihhlawhtlin anih loh chuan kum tam tak an lo tawrh tawhna avang hian na zawk a hmalak a ni ang tih an tarlang bawk.

NCAM ten lungawilohna an lantir hi Serchhip District-a NHM hnuaia thawk te pawhin thlawpin an hnathawhna hmunah Badge dum hi an bel a, Serchhip District-ah hian NHM hnuaia thawk hi mi 140 vel an awm nia sawi a ni a. Nimin khan NCAM hruaitute leh Sawrkar hotute chuan inbiakna neiin an hlawh hi pekchhuah an remti a, sum an hmuh hunah badge dum bel hi tihtawp an tum tih NCAM chuan an sawi a ni.