Minister in Chakai Farm Pilot Project a tlawh

Fisheries Minister, K. Lalrinliana chuan nimin khan Chakai Farm Pilot Project anga kalpui mekna, Dumlui, Kolasib chu tlawhin Fisheries Department hnuaia Blue Revolution kaltlanga Sangha Dil siam thenkhatte a tlawh bawk.

Helai hmun a tlawhna ah hian Fisheries Minister, K Lalrinliana chuan, Chakai chu Mizote chawhmeh ngainat tak a ni tih sawiin, amaherawh chu thianghlim leh mumal taka Farm anga kalpui a la nih ngai loh avangin enchhin nan Pilot Project anga kalpui hi a tul a ni, a ti a, Dumlui a Chakai Farm enchhinna ah hian Chakai 48,000 vulh theihna hmun tur siam niin hei hi hlawhtling tak a kalpui a nih chuan SEDP hnuaiah zau zawk a kalpui tum a ni ang, a ti.

Fisheries Minister chuan Blue Revolution hnuaia hamthatna dawngte tlawhin, “Tihtakna nen hlawhtlin tuma beitute chu Sawrkar hian a pui duh reng a, an hlawhtlinna hi a lawmpui tak zet thin a ni,” a ti bawk.

Dumlui, Kolasib-a ‘Pilot project on Crab Culture’ hi March, 2020 atanga enchhinna kalpui tan a ni a, Chakai chi tha lakkhawm niin Chi thlah tura dahkhawm tum a ni a, COVID-19 hripui leng vanga inkharkhipna kalpui a nih tak avangin ruahman lawk anga kalpui thei ni rihlo mahse, Chakai engemaw zat chu chi thlah tur a lakkhawm tawh a ni.