Kumin-ah Malaria vei hmuhchhuah 2317 awmin Malaria vanga nunna chan mi 3 an awm tawh
Kumin January atanga May 2020 inkar chhungin Mizoram-ah Malaria vei hmuhchhuah mi 2317 awmin Malaria vanga nunna chan mi 3 an awm bawk a. Nikum 2019 khan January atanga December 2019 inkar chhungin Malaria vei mi 8543 awmin thihpui mi 8 an awm bawk.
Nimin khan Mizoram-a Malaria dona kawnga thawktu Department hrang hrangte intelkhawmna, State Level Task Force Committee on Malaria Elimination thutkhawm chu Aizawl-ah neih niin he thu hi tarlan a ni a. He thutkhawm ah hian Department hrang hranga Official te telin he hun hmanpuitu Health Secretary, H. Lalengmawia chuan COVID 19 hrileng avanga lockdown kalpui mek a nih avang in mipui ten hunawl kan nei tam deuh nia a lan thu sawiin, hei hian Malaria case a punna kawngah kawngro a su nia a hriat thu a sawi a. Hei bakah hian ramri lama Duty mi engemaw zat an awm bawk avangin heng ah te hian Malaria case sanna remchang a awm thu a sawi bawk.
Health Secretary chuan Malaria leh natna dang dona kawngah hian Department hrang hrang te leh Kohhran leh khawtlang hruaitute an pawimawh vek tih sawiin, “Malaria umbo hna hi Health Department thawktute chauh tih theih a ni lova. Khawtlang mipuite nen nasa taka tanho a ngaih avangin Village Level-ah Malaria Programme hrang hrang te hi nasa lehzuala kalpui a ngai a ni,” a ti bawk.
He Convergence Meeting-ah hian Department hrang hrang atangin Officials te an kal tha hle a. National Vector Borne Disease Control Programme (NVBDCP)-a Joint Director, Dr. Lalremmawii chuan Meeting sawihawnna neiin Malaria um bo tura khawtlang mipuite rilru sukthlek tih danglam a tulzia sawiin, zirtirna thar inpek kan ngaih thu a tarlang bawk.
He huna tel Sawrkar Department hrang hrang aiawh te chuan Malaria dona kawngah anmahni Department theuha hma an lak ve theih dan tur te leh Health Department thawhpui an inhuam thu an sawi a. Central YMA aiawhte pawhin mipuite zirtirna kawngah leh Malaria natna umbona kawngah Health Department chu an theihna zawnah hmalak pui an inhuam thu an sawi bawk.
Comments
Post a Comment