Mizoram-a kalpui turin PMVDY hawnna neih a ni

Thingtlang mi kuthnathawktute tana buatsaih, Prime Minister Van Dhan Yojana (PMVDY) chu Mizoram-a a bultanna turin nimin khan hawn a ni.

PMVDY hi Cooperation Department leh Agriculture Department changtu Minister, C. Lalrinsanga chuan RCS Meeting Hall, PWD Tlang, Aizawl-ah hawngin PMVDY chu thingtlanga kuthnathawktu te leh miharsate chawikanna tur hmanraw pawimawh tak a nih a beisei thu sawiin, a bultanna tur hawn a ni ta chu lawmawm a tih thu a sawi a. Cooperation Department chu mipui tana Department pawimawh tak a nih thu leh hlawhtlinna an neih te sawiin Minister chuan, Cooperative Movement chuan khawvel hmun hrang hranga an ram hmasawn zelna turin an thawhhlawk thin hle ni, a ti.

Minister chuan Sawrkar laipuiin Cooperative Movement kaltlanga hmasawnna thlen tir a ngai pawimawh hle tih pawh sawiin, hemi kawngah hian a in hawn thu leh Mizoram-ah pawh nasa zawka hma kan lak a, PMVDY hi kuthnathawktu ten tangkai thei ang ber leh an hlawkpui theih zawk nan kan kalpui a pawimawh dawn thu a sawi bawk.

Agriculture Minister, C. Lalrinsanga chuan PMVDY hnuaiah ramngaw atanga thing ni lo, thildang lakkhawm Minor Forest Produce (Non-Timber Forest Produce)-ah ramhmul damdawi Mizoram-a awm ang ang te pawh hawl tela kuthnathawktuten an hlawkpui theih nan ngaihtuahna sen a tul tiin hemi kawngah hian MZU lama mithiamte chu rawn an nih thu pawh a tarlang bawk.

He Scheme hi tlangmi kuthnathawktuten an tharchhuah chi hrang hrang, a bik takin ramngaw atanga kan lakkhawm, Minor Forest Produce (Non-Timber Forest Produce) te hi a raw material anga hralh lovin, a hlutna belhchhah hnuah hlawk zawka hralh anih theihna tura Sawrkar laipuiin State sawrkawr kaltlanga a hmalakna a ni a. Tribal-ten MFP an lakkhawm reng reng man man taka hralh a nih theih nan Minimum Support Price (MSP) chu India rampum a hman turin Ministry of Tribal Affairs chuan a ruahman a. Tunah hian MSP list-ah item 73 a awm mek a ni. He list a la tello, Mizoram chhunga kan hmuh leh hralh theih ang chi thil 22 chu MSP list a telh turin hmalakna kalpui mek a ni a. MSP-MFP scheme hnuaia MFP lakkhawmna tur atan Procurement plan siam tawh a ni a, Ministry lamah TRIFED kaltlangin thehluh tura buaipui mek a ni.

He Scheme bul tan nan Mizoram-a District 7-a Cooperative Society 44 chu Van Dhan Vikas Kendra (VDVK) atana thlanchhuah an ni tawh a. Hemi atan hian TRIFED chuan cheng nuai 581.55 a rawn sanction tawh a. He scheme hi Mizoram pumah kalpui thuai turin chak taka hmalak mek a ni.