Hri kai 2 hmuh belh; mi 8 enkawl dam an ni thung

Niminpiah khan ZMC Laboratory-ah Sample 256 enfiah leh niin heng atang hian COVID-19 hri kai pahnih hmuhchhuah leh an ni a, heti hian Mizoram-a hri kai hmuhchhuah tawh zawng zawng chu 233 an tling ta a ni.

ZMC Laboratory-ah hian niminpiah khan mipa 171 leh hmeichhia 85 te Sample enfiah niin heng atanga hri kai hmuhchhuah te hi Aizawl District ve ve, mipa kum 29 a upa, Maharashtra atanga lo haw, June ni 28-a Aizawl lo thleng Assam Rifles sipai Zokhawsang-a khunghran mek leh Chandigarh atanga July ni 6 a lo thleng mipa tleirawl kum 12, quarantine lai mek te an ni a, hri kai hmuhchhuah thar te hi tun dinhmunah symptoms neilo an ni. Niminpiah vek khan Lunglei-a TrueNat Laboratory-ah Sample 31 enfiah ni bawkin hri kai hmuhchhuah an awmlo thung.

Hetihlai hian Siaha District-a hri kai hmuhchhuah leh enkawl mipa 8 te chu nimin khan Siaha Dedicated COVID Health Centre (DCHC) atanga chhuahtir an ni thung a, heti hian nimin thleng khan Mizoram-ah COVID-19 hri kai hmuhchhuah 233 an awm tawh a, heng zinga mi 159 te chu enkawl dam ni tawhin tunah hian mi 74 enkawl mek an la ni.